Талғарда әкім сайлауы қашан өтетіні белгілі болды
Талғар халқы жаңа әкімді қашан сайлайтыны белгілі болды. Бұл туралы Stan.kz ақпарат агенттігі хабарлайды.
Фото: mir24.tv
Орталық сайлау комиссиясының мәліметінше, Алматы облысы Талғар ауданының аумақтық сайлау комиссиясы қала әкімін 15 желтоқсан күні сайлайды.
15 қазан күні Талғар қаласының әкімі Бақыт Күрішбеков пен әкім орынбасары Сағындық Матан қызметінен босатылды. Бақыт Күрішбеков Талғарды 2022 жылдың жазынан бері басқарып келді. Сайлау алдында "Аманат" партиясы Талғар аудандық филиалының жауапты хатшысы қызметін атқарған.
Еске салайық, бұған дейін Талғарда жаппай төбелес болып, салдарынан 16 жастағы жасөспірім көз жұмған еді. Кейіннен жағдайдың мән-жайы анықталды. Жанжал жасөспірімнің отбасы жұмыс істейтін дүкенде басталған. Туыстарының айтуынша, сауда нүктесіне келген сатып алушы сыра алып, ақшасын төлеуден бас тартқан. Осыдан кейін төбелес басталған. Прокуратура жеті күдіктінің қамауға алынғанын хабарлаған.