Сот қыз зорлаған студент-гинекологты "таланты мен мақсаты бар адам" екенін ескеріп, жазадан босатып жіберген
Бельгияның Лёвен қаласындағы сот зорлау ісі бойынша кінәлі деп танылған, бірақ жазадан босатылған акушер-гинеколог мамандығы бойынша магистратурада оқитын Р.В. есімді студентке қатысты шешім шығарды. Бұл туралы Stan.kz ақпарат агенттігі HLN газетіне сілтеме жасап хабарлайды.
Фото: HLN газеті
Сот ер адамның жәбірленушінің физикалық, психологиялық және жыныстық шекарасын бұзғанын мойындағанымен, оны жазаламауды жөн көрді. Шешімде айыпталушының жас екені, бұрын сотталмағаны, сондай-ақ "талантты әрі мақсаты бар адам" екені ескерілгені айтылған. Сот оның кінәсін мойындауы – қайталап қылмыс жасау ықтималдығын төмендетеді деп шешіп, әлеуметтік өміріне зиян келтірмеу үшін оған жаза тағайындамады.
Айыпталушы жәбірленушіге 3800 еуро (2 125 908 теңге) өтемақы төлеуге міндеттелді. Егер ол алдағы бес жылда тағы бір қылмыс жасаса, онда бұл зорлау ісі бойынша да жаза алуы мүмкін. Осылайша, сот оны заң жүзінде сотталмаған адам ретінде қалдырды. Сонымен қатар сот жігітке жәбірленушіге жақындауға тыйым салатын бұйрық шығарудан бас тартты.
Оқиға 2023 жылдың 9 қарашасында Лёвендегі Recup барында болған. Студент қыз барда айыпталушымен танысып, кейін есін келесі күні таңертең оның төсегінде оянғанда ғана жиған. Қыздың айтуынша, ол тек бір бокал сыра ішкенін еске алады, одан кейінгісі есінде жоқ. Қыз жыныстық қатынасқа саналы түрде келісім бермегенін айтты. Сонымен қатар сол кезде етеккірі келгенін, сондықтан жыныстық қатынасқа баруы мүмкін емес екенін жеткізді.
Оқиға қоғамда, әсіресе, әлеуметтік желіде, үлкен наразылық тудырды. TikTok қолданушылары сот шешімін қатты сынап, болашақ дәрігердің мұндай әрекеті кешірілмейді деген пікірлер айтты. Көпшілік соттың тым жұмсақ үкім шығарғанына ашулы, әсіресе, ер адамның акушер-гинеколог болатынын ескерсек.
Лёвен университеттік ауруханасының бас дәрігері Герд Ван Аш бұл үкім бойынша университетпен бірлесіп шара қолданатынын және студенттің жұмыстан уақытша шеттетілгенін айтты.
Еске салайық, бұған дейін танымал актер Шәріп Серіктің бұрынғы сүйіктісі актердан зорлық-зомбылық көргенін мәлімдеген еді. Артынша актердің өзі бұрынғы сүйіктісіне қол көтергенін мойындап, кешірім сұрады. Ал сот актерді кінәлі деп тауып, 5 тәулікке қамауға алу туралы шешім шығарды.