Сирия бойынша Астана процесінің кепілгер елдерінің Катарда өткен кездесуінде не талқыланды – Сарапшы айтып берді

Катарда Сирия бойынша Астана процесінің кепілгер елдерінің кездесуі өтті. Журналист және Таяу Шығыс сарапшысы Ақмарал Баталова Eurasian Pulse сайтына мақала жазып, қатысушылардың кездесуде не туралы айтқанын мәлімдеді.

Фото: Mehmet Serkan Safak/Anadolu via Getty Images

Катар астанасында Сириядағы жағдай бойынша Астана процесінің кепілгер елдерінің жабық форматтағы отырысы өтті.

Оған Ресей сыртқы істер министрі Сергей Лавров, Иран сыртқы істер министрі Аббас Арахчи, Түркия сыртқы істер министрі Хакан Фидан және БҰҰ бас хатшысының арнайы өкілі Гейр Педерсен қатысты.

Доха форумы алаңындағы кездесуден кейін Мәскеу, Анкара және Тегеран Сирияның аумақтық тұтастығы мен егемендігін қолдайтынын айтып, соғыс қимылдары мен зорлық-зомбылықты тез арада тоқтатуға шақырды.

Астана процесінің кепілгер елдері БҰҰ қауіпсіздік кеңесінің 2254 қарарын толық орындауды талап етеді.

Ресей, Иран және Түркия сыртқы істер министрлері Сирия үкіметі мен заңды оппозицияны диалогқа шақырды.

Сондай-ақ тараптар Сирия дағдарысының шиеленісуін Астана форматы тиімді шеше алатынын растады.

Қарашаның соңында бұрынғы "Джебхат ан-Нусра" деген атпен белгілі "Хайят Тахрир аш-Шам" радикалды тобы мен сириялық бөлімшесі "Әл-Каиданың" (екі ұйым да террористік деп танылған және Қазақстанда тыйым салынған) қарулы құрылымдары, сондай-ақ Анкараның қолдауымен және оның ұйымдастырушылық көмегімен құрылған оппозициялық Сирия ұлттық армиясы Сирияның "экономикалық астанасы" Алеппоны басып алды.

5 желтоқсанда радикалды содырлар Сириядағы төртінші ірі қала Хаманы басып алды. Топтың жетекшісі Әбу Мұхаммад әл-Джулани Хомсты басып алу әрекеті әлі болмағанын, оппозицияның мақсаты Асадты құлату екенін айтты.

Хакан Фидан Сириядағы проблемаларды "Сирия әкімшілігінің өз халқымен ымыраға келе алмауынан, елдегі экономикалық мәселелердің күшеюінен, лаңкестік ұйымдардың қызметі мен мекемелердің дұрыс жұмыс істемеуінен" пайда болды деп санайды.

"Сирия бойынша бүгінгі Астана форматындағы кездесуде Сирия үкіметі мен заңды оппозиция топтары арасында саяси келіссөздерді бастау туралы шешім қабылданды және бұл бүгінгі Дохадағы кездесудің талаптары болды. Әрине, бұл мәселе бойынша біз Сирия үкіметімен кеңесу туралы шешім қабылдадық", – деп түсіндірді Аббас Арахчи.

"Ресей Федерациясы тыйым салынған "Хайят Тахрир әл-Шам" лаңкестік тобының Сириядағы жағдайды өзгерту әрекеттеріне қарсы. Қазір Сириядағыдай лаңкестерді геосаяси мақсаттарда пайдалану орынсыз нәрсе", – деді Сергей Лавров.

"Ең бастысы – Сирия мемлекетінің жойылуына жол бермеу", – деді БҰҰ бас хатшысының арнайы өкілі Гейр Педерсен.

Сондай-ақ 6 желтоқсанда Бағдадта Иран Ислам Республикасы, Ирак және Сирия сыртқы істер министрлерінің үшжақты кездесуі өтті. Жиынға қатысушылар Сирияның қауіпсіздігіне төнген қауіп аймақтың тұрақтылығына қауіп төндіретінін айтты.

Аймақтағы шиеленісті азайту үшін үйлестіру және дипломатиялық консультациялардан басқа амал жоқ.

Дохадағы кездесуде кепілгер елдер де Астана форматы Сирия дағдарысының шиеленісін шешудегі ең тиімдісі екенін растады.