Құжаттарда бұл кешен "халықаралық деңгейдегі туристік нысан" ретінде көрсетілген. Мақсаты көктемгі су тасқынын ұстау, жергілікті және шетелдік туристер үшін жайлы демалыс орнын жасау, инвесторларды тарту, жаңа жұмыс орындарын ашу және өңір экономикасын дамыту деп көрсетілген.

"Түркістан облысында мұндай жобаларға ақша аямайды. 2020-2021 жылдары жасанды көлдің түбін тереңдетіп, жаға бекіту жұмыстарына және суасты каналын салуға 1,8 миллиард теңге жұмсалған. Ал 2022 жылдың қарашасында 7 миллиард теңгеден астам қаржы игеріліп, пирстер, көпірлер, душ кабиналары бар киім ауыстыру орындары, дәретханалар, кассалар және жалға беру пунктері салынған. Алайда бұл миллиардтаған қаржыға салынған жағажайға халық бармайды. Көлдің суы балдырланған, шомылу үшін жарамсыз, ал жағасы батпаққа айналған", – деп жазды қоғам белсендісі Дидар Смагулов.

Қоғам белсендісінің әріптесі жазда барып көргенімен, суға түсуге батылы бармаған. Сол кезде жағажайда жалғыз бір жұп қана болған. Дидар Смагулов инфрақұрылымның жағдайы өте мүшкіл екенін айтады. Оның айтуынша, кей жерлерде тас төсеуіш төселмеген, орындықтар, жарық бағаналары (шамдары жоқ), ағаштар қарастырылмаған.

"Миллиардтаған қаржы бөлінген көгалдандыру жұмыстары құр топыраққа шаншылған құрғақ бұтақтармен шектелді. Ал құжаттарда бұл жерге көлеңке түсіретін үйеңкі ағаштары, әткеншектер, субұрқақтары мен гүлзарлар орнатылғаны жазылған. Бірақ көлеңке беретін ағаштың орнына жіп-жіңішке таяқтар ғана тұр. Сорғы станциясы әлі бітпеген, қымбат терең су сорғысын жауыннан қорғау үшін қоқыс жәшігімен жаба салған. 9 миллиард теңге – бұл шамамен 20 миллион доллар (2025 жылғы доллар бағамы бойынша 10 058 600 000 теңге). Мұндай ақшаға Дубай тұрғызуға болар еді. Айтар сөз жоқ. Тағы бір арыз Антикорға жіберілді", – деді Дидар Смагулов.

Посмотреть эту публикацию в Instagram

Публикация от Астана ВКурсе (@vkurse_astana)

Желіде оқырмандар мұндай заңсыздықтардың тоқтату керек екенін жазды.

“Бұрын көбіне жұмыстарды нашар жасап, аздап ұрлайтын. Қазір болса, ашық түрде ұрлап жатыр. Неге екені белгісіз, ешкімнен қорықпайтын сияқты...”, “Олардың ойынша, кім демалуы керек еді?? Әлемнің түкпір-түкпірінен туристер келуге тиіс пе екен?”, “Әуелі дереу жасаған жоқ, ал қазір оны жалғастырудың түк мәні жоқ. Біздің ауыл шаруашылығы министрлігі заң шығарды. Енді бізде еш жерде суға түсуге болмайды”, “Жылағым келеді. Адамдарда ұят жоқ”, – деп қынжылды желі қолданушылары.

Істің анық-қанығын білу үшін редакция Түркістан облысының әкімдігіне сауал жіберді. Әкімдіктегілер "шалшық көлге" қатысты экономикалық тергеу департаменті тексеріс жүргізіліп жатқанын мәлімдеді. Тергеу департаменті енді жоба аясында атқарылған жұмыстардың көлемін анықтап жатқаны көрінеді.

"2024 жылдың ақпанында сараптама жүргізу үшін нысан қайта қаралды, қорытындысы шығады. 2023 жылғы су тасқыны кезінде көлге артық су жиналып, нысанға зиян келтірілді. Көлді толыққанды пайдалануға беру үшін "Кенсай-Қосқорған-2" су қоймасынан тұрақты су беру қажет. Қазір құрылыс-монтаж жұмыстары уақытша тоқтатылған. Жұмыстың бірінші кезеңінде саябақ салу, аумақты функциялық аймақтарға бөлу (белсенді демалысқа арналған спорт аймағы, гольф алаңы, балалар ойын алаңы) болған еді. Алайда жобаның тиімсіздігіне байланысты құрылыс басталған жоқ, жоба-сметалық құжаттама әзірленбеген", – деді Түркістан әкімдігі.

Осы ретте әкімдік жасанды “Шаға” көлі жобасының екі кезеңіне жалпы 9,3 миллиард теңге бөлінгенін айтады. Бірінші кезеңге – 7,2 миллиард теңге (құрылыс-монтаждау жұмыстары – 6,6 миллиард теңге, жобалық-сметалық құжаттама – 215,7 миллион теңге, инженерлік қызметтер – 183,5 миллион теңге) бөлінген. Екіншісіне – 2,1 миллиард теңге. Бірақ бұл учаске бойынша жұмыстар жүзеге асырылған жоқ. Жоспарланған жұмыстарға көлді қоршау, көгалдандыру, суару жүйесі, сыртқы жарықтандыру, көпірлер, сорғы станциясы, көлді айналдыра жол салу және К-3 каналының құрылысы жүргізілуі керек еді.

Әкімдік "Кенсай-Қосқорған-2" су қоймасынан су тұрақты түрде берілсе, нысан толыққанды жұмыс істейтінін ескертті.

Талқылау