Шымкенттен Ташкентке дейінгі жол ақылы болады

Шымкент-Жібек жолы трассасы 2020 жылдың қараша айынан бастап ақылы болады. Сондай-ақ Шымкент - Ташкент - Шымкент жолы да тестілік режимге берілетіні белгілі болды. Бұл туралы "Қазавтожол" республикалық мемлекеттік кәсіпорнының Түркістан облысы бойынша филиалы мәлімдеді, деп хабарлайды Stan.kz ақпарат агенттігі. 

Әзірге 300 шақырымдық учаске бойынша жол жүру үшін тек жүк көлігінің жүргізушілері ғана төлейтін болады. Жаңа жылдан бастап төлем барлығына бірдей болады.

"Қазавтожол" мамандарының мәліметінше, терминалдармен орнатылған үш арка алғаш рет тестілік режимде жұмыс істейтін болады.

Жеңіл автокөлік иелеріне Шымкент - Жібек жолы трассасы бойынша жол жүру ақысы 2021 жылдың басында іске қосылады. Болжамды құн километр үшін бір теңге деңгейінде қаралады.

Жүк көліктерінен қандай ақы алынатыны туралы әлі нақты шешілген жоқ. Оны орнату кезінде көлік құралының салмағы, сондай-ақ санаты ескеріледі.

• Елдегі ақылы жолдар бір жылда бюджетке қанша қаржы алып келді


• Қазақстанда жыл соңына дейін тағы 9 жол ақылы болады

"Қазір ақылы жолға он бақылау аркасынан үшеуі орнатылды. Және үш клиенттермен жұмыс орталығы салынды. Сонымен қатар, осы жылы Шымкент - Ташкент - Шымкент тас жолының учаскесін тестілік режимге беру жоспарланған", - дейді "Қазавтожол" РМК Түркістан облыстық филиалы басшысының орынбасары Ерлан Кенжеханов.

Жаңа жабдықты тестілеу аяқталғаннан кейін, 2021 жылдың қысында Қазақстан Республикасы автожолдар комитетінде Шымкент - Жамбыл және Шымкент - Түркістан бағытындағы автожолдар бойынша жүріп өту үшін ақы алу мәселесін қарау жоспарлануда.

"Қазавтожол" өңірлік филиалында сондай-ақ, автокөлігі бар жергілікті тұрғындар үшін ақылы автожолдармен жүруге жылдық абонементтерді енгізу нұсқасы пысықталуда. Жол жүру бағасы қарашаға қарай жарияланады.