Шымкенттің токсикологтары қарақұрт тістеген науқастарды тоғызыншы күн қатарынан қабылдауда. Тоғыз зардап шегушінің үшеуі кәмелетке толмағандар – 16 және 14 жаста.

Өзбекстан тұрғыны Ихвалбек Ихсанов Шымкентте құрылыс алаңында жұмыс істейді. Түнде ер адам далада ұйықтап жатқанда оны жәндік шағып алған. Ихвалбек бірден сезіп, ауруханаға жүгінген.

“Жұма күні мені тіземнен өрмекші шағып алды, ол қатты ауырды, денемді сезбедім, барлық жерім ауырды. Дереу жедел жәрдемге қоңырау шалып, мені алып кетті”, – деді науқас Ихвалбек Ихсанов.

“Көбінесе түнде, адамдар далада ұйықтап жатқанда шағады. Адамдар негізінен қаланың шетінен келеді”, – деді Орынбаев атындағы гипербарикалық оксигенация орталығының токсикологиялық бөлімі меңгерушісінің міндетін атқарушы Марат Кәкенов.

Сонымен қатар токсикологтардың айтуынша, күн сайын адамдар буынаяқтылардың шаққанына шағымданып келеді. Рас, жаздың ортасына дейін олардың уы қауіпті. Науқастарға алғашқы көмек көрсетіліп, үйлеріне жіберіледі. Шымкенттіктер жыландардан да қорқып отыр. Тұрғындар жорғалаушыларды аулау үшін құтқарушыларды шақырады.

“Осы жылдың алты айында жедел-құтқару жасағының құтқарушылары жыландарды аулауға 24 рет барған. 9 жыланды ұстап алды. Өткен тәулікте ғана "112" пультіне Абай және Қаратау аудандарынан екі өтініш келіп түсті. Біздің мамандар екі жыланды ұстады: біреуі ұзындығы 1 метр, екіншісі – 70 сантиметр”, – деді Шымкент қаласы ТЖД Жедел-құтқару жасағының басшысы Орынбасар Тұртбаев.

Жыландарды аулағаннан кейін олар елді мекендерден шығарылады. Құтқарушылардың айтуынша, Шымкентте улы жыландар жоқ. Дегенмен, жаз – қауіпті жәндіктер мен өрмекшілердің белсенділігі арта түсетін кезең. Шаққан жағдайда бірден жедел жәрдемге хабарласу керек.

Талқылау