Шәріп Серіктің бұрынғы сүйіктісі актердан зорлық-зомбылық көргенін мәлімдеді
Актер Шәріп Серіктің бұрынғы сүйіктісі тұрмыстық зорлық-зомбылық құрбаны болғанын айтып, актердің лифтте шабуылдаған видеосын жариялады. Бұл туралы Stan.kz ақпарат агенттігі хабарлайды.
Фото: Alya_Booteyeva Instagram-парақшасы
Жақында Шәріп Серік Say Mo-дан кейін қосылған жары Әлия Бутеевамен де ажырасып кеткенін айтқан еді. Содан кейін Әлия Бутеева оған актер қол көтергенін мойындап, желіде ағынан ақтарылды.
“Тіпті ең қорқынышты түсімде ешқашан “сүйікті адамым маған қол көтерді” деп айтатын қыз боламын деп ойламадым. Бірақ солай болды. Мен кесіп өтуге болмайтын шекара болуы керек деп есептеймін. Сондықтан бұл фотолар мен видеоларды жарияламасам, өзімді сатып жібергендей боламын. Профессор болмай тұрып, мен лайықты тәрбие мен білім алсын деп еден жуған әкеме опасыздық жасаймын. Ағам екеумізді қамтамасыз ету үшін тырысып, нағыз отбасы болып өмір сүрейік деп тамаша еңбек жолын қалдырған анама опасыздық жасаймын. Мен физикалық тұрғыдан әлсіз болсам да, мен үшін қолайсыз нәрсе туралы үнсіз қала алатындай моральдық тұрғыдан әлсіз емеспін. Мен өзімді және намысымды қорғауға мәжбүрмін”, – деді қыз.
Сөзінше, ол мұны жариялау арқылы қызға қол көтеру қалыпты нәрсе емес екенін түсіндіргісі келеді. Жазбасына қарасақ, Бутеева арыз жазбаған.
“Шыдап отырмай, дереу арыз жазуым керек еді. Бірақ мен қатты абдырап қалғаным сонша, не болып жатқанына сене алмадым. Кек алуды немесе жауласуды қаламаймын, бірақ мен басқаша әрекет ете алмаймын. Өзіңіз қорытынды шығарыңыз. Бұл бізбен аяқталады деп үміттенемін”, – деді Шәріптің экс-сүйіктісі.
Роза Әшірбаева, Айтбек Амангелді сынды белсенділер қызды қолдайтындарын мәлімдеп, режиссерлардан Шакенти атымен белгілі актерді енді жұмысқа шақырмауды талап етті. Олар мұндай жұлдыздардан халық бас тартуы керек деп санайды.
Шәріп Серіктің бұрынғы жары Say Mo да қызға қолдау білдірді.
“Сені түсінемін және толықтай қолдаймын”, – деді әнші.
Осы жайттан соң Salem Entertainment компаниясы актермен әріптестік қарым-қатынасты тоқтататынын мәлімдеді.
“Salem Entertainment ұжымы Шәріп Серікті “қара тізімге” енгізіп, онымен ынтымақтастықты тоқтатты.
“Шакал” сериалы мен “Qarga” сериалының үшінші маусымы ресми түрде жабылды. Актер Meow сериалының екінші маусымында басты рөлдердің бірін сомдауға тиіс болған, алайда ол жобадан алып тасталды. Онымен барлық келісімшарт тоқтатылды”, – деп мәлімдеді компания.
Сондай-ақ бұған дейін шыққан фильмдерде Шәріп Серік бар көріністерді алып тастамақ.
"Баланы тұз қосылған суға шомылдыру, омырауын сығу" сынды салттар қаншалықты дұрыс – Мамандар жауап берді
