"Сенің басың дұрыс істей ме өзі?": Желіде ШҚО шенеуніктерінің жиналыстағы сөзі қызу талқыға түсті

видеодан скрин

Қазақстанның Туризм және спорт министрлігі Өскемендегі спорт шенеуніктері арасындағы Zoom-байланыс кезінде түсірілген даулы видеоға қатысты пікір білдірді. Бұл туралы Stan.kz ақпарат агенттігі хабарлайды.

"Kozachkov offside" Telegram-арнасында Өскемендегі спорт саласы шенеуніктері арасында өткен даулы онлайн-жиналыстың видеосы жарияланды.

"Видео сипаттамасында Zoom-кеңеске спорт шенеуніктері қатысқаны, ал сөз сөйлеген адамның ШҚО спорт басқармасының міндетін атқарушы басшысы Асқар Можанов екені айтылған. Мемлекеттік қызметкердің жұмыс мәселелерін талқылау тәсілі біртүрлі екені байқалады. Сонымен қатар, оның "шашы жоқ әкім" деп кімді меңзегені де қызық болды", – делінген жазбада.

Бейнежазбада спикердің бірнеше рет бейәдеп сөздер қолданғаны естіледі. Жазбаның басында ол бір белгісіз қызға анықтама үшін ұрысып жатқанын көруге болады.

"Мүмкін, сен оны еден жуушыға беріп қойған шығарсың? Сенің басың дұрыс істей ме өзі? Шашы жоқ біреу облыс әкіміне оған екі жедел жәрдем бер, "ақша тапсын" деп жазыпты. Оған бірден сарай берейік", – деген сөздер естіледі.

Сондай-ақ ол басшылардан өз тәрбиеленушілерін журналистермен сөйлесуді үйретуді сұраған. Себебі Құрбанов есімді спортшының сұхбаты "министрге" ұнамаған көрінеді.

Бұл жағдайға Туризм және спорт министрлігінің баспасөз хатшысы Балым Адамиденова әлеуметтік желіде пікір білдірді. Ол министрлік спортшыларға қатысты мәселелер қозғалғандықтан, бұл мәселеге қатысты мәлімдеме жасауға мәжбүр болғанын мәлімдеді.

"Кеңес барысында қолданылған коммуникация форматы, айтылған сөздер министрлік ұстанатын қағидалар мен құндылықтарға сәйкес келмейді. Спорт саласындағы барлық қатысушылар өз қызметінде ресми және спорттық этика нормаларын сақтауы тиіс, бейәдеп сөздер мен диалог қатысушыларына құрметсіздікке жол берілмеуі керек", – деді Адамиденова.

Министрлік спортшылардың өз көзқарасын білдіруге құқығы бар екенін қолдайтынын, бұл жағдайға байланысты жергілікті атқарушы орган тиісті шара қабылдауы тиіс екенін атап өтті. 

Еске салсақ, 2025 жылдың шілдесінде әлеуметтік желілерде "ҚТЖ-Жүк тасымалы" ЖШС бас директорының локомотив шаруашылығы жөніндегі орынбасары Асан Өмбетовтың қатты сөйлеген видеосы тараған болатын. Бұл оқиға Қарағанды облысында вагондардың рельстен шығып кетуімен байланысты болған. Видеода ол бейәдеп сөздермен қызметкерден қатаң түрде есеп талап еткен.

Осыдан кейін "ҚТЖ" басшысынан осы жағдайды түсіндіру талап етілді.

Бұған дейін Премьер-министр Олжас Бектенов өзінің Үкіметті басқару стилі және сынға деген көзқарасы туралы пікір білдірген еді.

"Мен дауыс көтеріп сөйлеу немесе қатты сөйлеу – басқарудың ең тиімді әдісі деп есептемеймін", – деген еді ол.