Салық мөлшерінің артуына байланысты Henkel Қазақстаннан Өзбекстанға көшпек
Еуропалық одақтың Ресейге қарсы санкцияларына байланысты Қазақстанға келген Henkel Central Asia&Caucasus енді өндірісін Өзбекстанға көшіруге ниетті. Бұл туралы Stan.kz ақпарат агенттігі хабарлайды.
Мұны неміс компаниясының қаржы директоры Стефан Морланг пен Қазақстанның мұнай сервистік компаниялар одағының Бас директоры Нұрлан Жұмағұлов мәлімдеді.
Компания үшін салық мөлшері үлкен көрінеді.
"Айтуынша, көшудің үш негізгі себебі бар. Біріншісі – Қазақстанның салық заңнамасындағы өзгерістер, нәтижесінде корпоративтік салық үш есе артқан. Екіншісі – елдегі тұрақсыз жағдай. Үшіншісі – Қазақстанда білікті кадрлардың жетіспеушілігі”, – деді Жұмағұлов.
Henkel-дің Өзбекстанға қашан көшетіні әзірге белгісіз.
Henkel Central Asia&Caucasus – посткеңестік кеңістіктегі ең ірі тұрмыстық химия өндірушілердің бірі. Компанияның ең танымал өнімдерінің тізіміне Persil, Losk, "Дени", "Ласка", "Пемос", "Пемолюкс" және Vernel тазалағыш заттары, сондай-ақ "Момент" желімі кіреді.