Риддердегі "Шаңырақ" мектебі жабылды деген қауесетке білім басқармасы жауап берді

Жақында әлеуметтік желіде Шығыс Қазақстан облысы Риддер қаласындағы "Шаңырақ" қазақ мектебі жабылады деген ақпарат тараған еді. Облыстың Білім басқармасы бұл ақпаратты жоққа шығарып, қазіргі таңда оқушылардың басқа ғимаратта оқып жатқанын жеткізді. 

ШҚО білім басқармасының мектепке дейінгі, жалпы орта білім беру бөлімінің басшысы Бұлбұл Қозыбаева аталған мәселе бойынша түсініктеме берді.

"2023-2024 оқу жылында бізде облыс бойынша ешқандай мектеп жабылған жоқ. Қазір жабылмайды да. Қазіргі уақытта барлық балалар білім берумен қамтамасыз етілген. Соның ішінде "Шаңырақ” қазақ мектебінің оқушылары да бар. Ғимаратқа күрделі жөндеу жұмыстарының қажеттілігіне байланысты мектеп басқа ғимаратқа ауыстырылды. Штаттық режимде жұмыс жасап жатыр. Барлық бала білім алуда", - дейді білім басқармасының басшысы.

Қазіргі таңда мектеп үшін жаңа ғимарат салынып жатқаны хабарланды. Құрылыс жұмыстары келесі жылы аяқталады деп күтілуде.