Отандық әнші: Оқушылар мен студенттердің діни құлшылық жасауына заңмен тыйым салу керек
Отандық дәстүрлі әнші Ерлан Төлеутай оқушылар мен студенттердің діни құлшылық жасауына қарсы шықты. Бұл мәселе заңмен шешілуі тиіс деген ойын ортаға салды. Алайда әншінің сөзін қолдағандар да, қарсы шыққандар да жетерлік.
Бұл туралы Ерлан Төлеутай желідегі парақшасында жазды.
“Таяуда бір мұғаліммен əңгімелесіп, ораза жайында сұрадым. "Не істерімізді білмейміз” деп қынжылады мұғалима: – Оқушылар сабаққа дайындалмай келеді, ораза ұстайтынын міндет қылады, оларға бірдеңе дейін десең, ата-аналары балам ораза ұстап жүр, басын қатырмаңдар” деп арсылдап өзіңмен ұрыссады. Ал мектептерде ораза ұстау жылдан жылға "мода" болып келеді, ораза ұстамаған бала діншіл тұрғыластарының қысымына ұшырамау үшін еріксіз ауыз бекітеді дейді. Мұғалиманың сөзі мені еріксіз қайран қалдырды. Иə, мектептерге "зонаның" яғни түрменің, қылмыс əлемінің жүйесі ене бастаған. Тіпті абақтыларға мектептерден "греб" жинайтын топтар бар көрінеді. Бұл енді сұмдық қой!”, – деп жазды әнші.
Ерлан Төлеутай мұғалімдердің сөзіне сүйене отырып, кей оқушылардың мектептегі жауапкершіліктен қашу үшін ораза ұстайтынын айтады.
- Дастан Қалдыбаев: Бірінші некемнен екі балам бар, екінші әйелімді алғаныма бір жыл болды
- Нұрболат Абдуллин: Мен әкем үшін арманымнан бас тартқан адаммын
“Көзі қарақты, əсіредіншілдіктен аулақ, діни санадан азат мұғалімдердің пікіріне сүйенсек, кейбір оқушылар оразаны сабақ оқымау, мойнына бір жауапкершілікті алмау, бір жауапкершілікті жүктейін десең, "мен оразамын" деп жеңіл құтылу үшін ұстайтын көрінеді. Осылайша жас ұрпақты өтірікке үйретіп жатқан көрінеміз. Ал керек болса! Қысқасы жағдай осылай. Қазақ қоғамы осылайша бірте-бірте ортағасырлық діни түнекке батып барамыз. Егер осы қарқынмен кете берсек, қара жамылған Ауғанстан мен араб əлемінің діни мемлекеттерін куып жетпесімізге кім кепіл? Құдай бетін аулақ қылсын!
Олай демейін десең, кешегі қадір түні қарсаңында БАҚ, телеарна мен радио біткеннің жарыса діни уағыздар айтып, жақтары бір тынбай сұңқылдап жатқанын көргенде, өзіңді бір сəт Сауд Арабиясында жүргендей сезіне жаздайсың. Ал мемлекет өзі атап өтуге заңды пəрмен берген 31 мамыр - қуғын-сүргін құрбандарын еске алу жөнінде жаңалықтардан бірде-екілі жұпыны сюжеттер өткені болмаса, басқа бір ауыз сөз жоқ”, – деп жазды Ерлан мырза.
Отандық әнші мектеп оқушылары мен студенттерше заң негізінде діни құлшылық жасауға тыйым салу керек дегенді кесіп айтты. Балаларды әсіре діншілдікке салмай, заң жүзінде қорғауға шақырады.
“Дегенмен мемлекет болып, қоғам болып бір қайрат қылатын кез келді. Тым болмаса, кеш қалмай тұрғанда балаларды діни ағымдардың ықпалынан қорғайық, мектептердің діни күштердің аран аузына жұтылып кетпеуі үшін араша түсейік. Мəселен балалар мен жасөспірімдерді 16 жасқа дейін еңбекке тартуға болмайды деген тəп-тəуір заңымыз бар ғой, сол заңның негізінде мектеп оқушылары мен студенттерге діни құлшылықтар жасауға тыйым салатын заңдар қабылдайық. Жас өскіндерімізді тəннің де, жанның да (рухани) нанына тойдырып өсірудің қамын қылайық. Әйтпесе үлкен-кішіміз құлшылық, құлшылық деп жанталасып жүргенімізде жас ұрпақтың жат ағымдардың құлы боп кеткенін сезбей қалатын түріміз бар. Бұл дегеніміз – ұрпақтан айырылу, ұрпақтан айырылу – Тəуелсіздіктен айырылу деген сөз. Нанға тоймай өскендердің қандай жемқор болатынын сіз бен біз отыз жыл бойы армансыз көріп келе жатқан жоқпыз ба?”, – деп жазды.
Әншінің бұл жазбасы қызу талқыға түсті. Желі қолданушыларының бір бөлігі әншінің сөзін қостаса, енді бірі қарсы шықты.
