Өрт сөндірушілерге кедергі келтірген: Қарағандыда өрт шыққан ферроқорытпа зауытының басшылығы сотталды
Қарағанды қаласының әкімшілік құқық бұзушылықтар жөніндегі аудан аралық сотында "YDD CORPORATION" ЖШС-дегі мемлекеттік бақылау және қадағалау органдарына қызметтік міндеттерін орындауға кедергі жасау фактісі бойынша әкімшілік іс қаралды. Бұл туралы Stan.kz ақпарат агенттігі хабарлайды.
Фото: yddcorp.kz
2024 жылдың 20 шілдесінде "YDD CORPORATION" ЖШС ферроқортыпа зауытындағы пештен өрт шығып, салдарынан сегіз адам зардап шеккені анықталды. Зардап шеккен 4 жұмысшы көз жұмды.
Соттың мәліметінше, оқиға орнына келген Қарағанды облысы төтенше жағдайлар департаменті қызметкерлеріне "YDD CORPORATION" ЖШС-нің сенімді өкілдері кедергі келтіріп, оқиға туралы ақпарат беруден бас тартып, ТЖД қызметкерлерін 40 минут зауыт аумағына кіргізбеген.
“Осы факті бойынша "YDD CORPORATION" ЖШС-не қатысты “мемлекеттік бақылау және қадағалау органдарына қызметтік міндеттерін орындауға кедергі жасау” бабымен әкімшілік іс қозғалып, сотқа жолданды. Сотта "YDD CORPORATION" ЖШС-нің өкілі тағылған әкімшілік құқық бұзушылық бойынша кінәсін мойындамады, "YDD CORPORATION" ЖШС-нің кінәсі іс бойынша келтірілген дәлелдермен расталды”, – делінген сот хабарламасында.
Сотта "YDD CORPORATION" ЖШС-не 200 айлық есептік көрсеткіш мөлшерінде әкімшілік айыппұл түріндегі жаза тағайындалды. Сот қаулысы заңды күшіне еңген жоқ.
Еске салсақ, бұған дейін Қарағанды ферроқорытпа зауытында апат болып, 8 жұмысшы жарақат алғаны туралы жазған едік.