"Опырылып құлап жатыр": Қостанай тұрғындары жөндеу жұмыстарына 2 миллиардтан аса ақша жұмсалған жағалау жағдайына шағымданды
Қостанай тұрғындары екі миллиард теңгеден астам қаржы жұмсалған жағалаудың жағдайына наразылығын білдірді. Олардың айтуынша, жөндеу жұмыстары бірнеше жылға жоспарланған. Дегенмен жағалаудың бір бөлігі аяқталып жатқанда, екіншісі ыдырап, құлап жатыр. Бұл туралы Stan.kz ақпарат агенттігі Информбюро бағдарламасына сілтеме жасап хабарлайды.
Фото: Видеодан скрин
2024 жылы көктемдегі су тасқыны кезінде триатлон саябағы толығымен су астында қалды. Жөндеу жұмыстары Тобыл қазіргі бағытына оралғаннан кейін ғана жалғасты. Жөндеу жұмыстары аяқталуға жақын. Бірақ қала тұрғындарының қуанышы ұзаққа созылмады. Себебі қар еріп, жағалау қайта жөндеуді қажет етіп отыр.
“Бәрі опырылып түсіп жатыр. Қазір ғана көріп келдім. Жағалау бәз-баяғы қалпына қайта түскендей”, – дейді тұрғын.
Тұрғын үй-коммуналдық шаруашылық басқармасының сектор меңгерушісі Нұрдәулет Бейсеновтың сөзінше, алматылық мердігер нысанды былтыр күзде тапсыруға тиіс болған. Бірақ үлгермеген.
“Жобаның құны 2 миллиард 13 миллион теңге. Оның ішіне 570 метрлік тірек қабырғасын салу, 12 ойын алаңы мен спорт алаңдарын орнату кіреді. Кәсіпорынның абаттандыру жұмыстарын аяқтап, саңылаулар мен ақауларды түзетуге тағы бір ай уақыты бар. Бұл жоба бойынша тас төсеу жұмыстары қыс мезгілінде ішінара жүргізілді. Ауа райының жылынуына байланысты брусчаткалардың бір бөлігі опырылып қалды. Оның жалпы көлемі алаңның 10 пайызын алып жатыр”, – дейді Бейсенов.
Әкімдік мәліметінше, нысан 95 пайыз орындалды, пайдалануға берілгеннен кейін мердігердің тағы үш жылға кепілдік міндеттемелері болады.
Айта кетейік, бұған дейін ерекше қажеттігі бар алматылық тұрғынның инватакси қызметіне көңілі толмайтынын айтып, шағымданған еді.