Ауғанстанда жойқын жер сілкінісі болып, 600-ден астам адам қаза тапты (видео)

Ауғанстанның шығысындағы Кунар провинциясында магнитудасы 6-ға жететін жер сілкінісі болып, алдын ала мәліметтер бойынша 600-ден астам адам көз жұмды, 1500 адам жараланды. Бұл туралы Stan.kz ақпарат агенттігі хабарлайды.

Ауғанстан Ақпарат министрлігінің хабарлауынша, ең көп зардап Кунар провинциясының аудандарында тіркелген, жолдар топан су мен жер қабаты сырғуы салдарынан жабылған, іздеу-құтқару жұмыстары тікұшақтардың көмегімен жүргізіліп жатыр. 

Ауғанстан уақытша үкіметінің баспасөз хатшысы Забихулла Муджахид АҚШ компаниясы X әлеуметтік желісінде жер сілкінісі адам шығынына алып келгенін растады.

“Өкінішке қарай, бүгінгі жер сілкінісі шығыс провинцияларында адам өліміне және материалдық залалға әкелді”, — деді ол.

Ол жергілікті билік пен тұрғындардың құтқару операцияларына қатысып жатқанын, орталық үкімет пен көршілес провинциялардан командалар апат аймағына жіберіліп жатқанын атап өтті.

Жергілікті шенеуніктер бұл елде болған ең күшті жер сілкіністердің бірі екенін атап өтті. Сонымен қатар, өңірде магнитудасы 5,2-ге жететін кем дегенде екі қайталама дүмпу тіркелген.

АҚШ Геологиялық қызметінің (USGS) дерегінше, жер сілкінісінің эпицентрі Джелалабадтан солтүстік-шығысқа қарай 27 шақырым жерде, 8 шақырым тереңдікте орналасқан, Пәкістанмен шекараға жақын.