Сот әкімдіктерді митинг өткізуден бас тартпас бұрын, басқа орын мен уақыт ұсынуға міндеттеді
Конституциялық сот әкімдіктің азаматтарға митинг өткізуден бас тартпас бұрын, бос болатын басқа да орындар мен басқа уақыт ұсынуға міндетті екенін жеткізді. Бұл туралы Stan.kz ақпарат агенттігі хабарлайды.
Фото: freepik.com
Бұған дейін құқық қорғаушылар бейбіт жиындар туралы заңның ережесін тексеру үшін конституциялық сотқа жүгінген еді. Бұған елорда әкімдігінің 2023 жылғы ақпанда "масс-медиа туралы" заңға қарсы митинг өткізуден бас тартуы себеп болды. Әкімдік сол кезде өзге де іс-шаралардың өту себебінен орын жоқ екенін айтқан.
Құқық қорғаушылардың пікірінше, конституцияға сәйкес егер мәлімделген уақытта және жерде іс-шара жоспарланса немесе құрылыс-монтаж жұмысы жүргізілсе, әкімдіктер бейбіт жиналысты ұйымдастырушылардың өтінішінен бас тарта алады.
"Конституциялық сот заңда бейбіт митингтерді өткізуден бас тарту туралы шешім негізделген және дәлелді болуы керек императивті талап бар екенін атап өтті. Сондықтан әр жағдайда бейбіт жиынды өткізуден бас тарту туралы шешім іс-шаралардың мақсаттарын, өзектілігін, қоғамдық маңызы мен ауқымын, сондай-ақ өзге де объективті факторларды ескеруі керек. Содан кейін барлық қолда бар мән-жай мен ықтимал қауіптерді мұқият талдауға негізделуге тиіс", – делінген хабарламада.
Бұл ретте, заңда әкімдік бас тартпас бұрын митинг ұйымдастырушысына іс-шараның орнын немесе уақытын өзгертуді ұсынуға тиіс екені жазылған. Конституциялық сот мұның міндетті талап екенін еске салды.
"Ұйымдастырушы мұндай ұсыныспен келіскен жағдайда, жергілікті атқарушы органның бейбіт жиынды өткізуден бас тартуға құқығы жоқ. Ал ұйымдастырушының орын мен уақытын өзгертуге келісім жауабы болмаса, жергілікті атқарушы орган бейбіт митингті өткізуден бас тарта алады", – делінген хабарламада.
Конституциялық сот қаулысы қабылданған күннен бастап күшіне енеді. Құжатта оның Қазақстанның барлық аумағында міндетті екені атап көрсетілген.