Іс Шығыс Қазақстан облысының қылмыстық істер жөніндегі мамандандырылған ауданаралық сотында қаралды. Сотта Т есімді азамат “Адам өлтіру” және “Қаруды заңсыз иемдену, сақтау, тасымалдау" бойынша кінәлі деп танылды. Сонымен қатар, азамат Г “Аса ауыр қылмыс туралы хабарламағаны үшін” айыпталды.

"Сот анықтағандай, азамат Т спортшы Юнусметовты қасақана өлтіру үшін қысқартылған ТОЗ-63 мылтығымен қаруланып, танысы азамат Г-дан оны қала орталығына жеткізуді сұраған. Азамат Г оны сұраған жеріне жеткізеді. Оқиға орнына жеткеннен кейін күдікті Т Юнусметовке хабарласып, кездесуді Пушкин атындағы кітапхананың жанында өткізуге келіседі. Юнусметов сол жерге келгенде, Т оған екі рет оқ атып, жарақаттардың салдарынан Юнусметов оқиға орнында қаза тапты. Оқиғаға куә болған азамат Г бұл қылмыс туралы құқық қорғау органдарына хабар бермей, керісінше, Т-мен бірге оқиға орнынан қашып кеткен”, – делінген хабарламада.

Сот барысында Т-ның кінәсі оның өзі берген жауаптарымен, куәгерлердің көрсетулерімен, сараптамалық қорытындылармен және бейнебақылау камераларының жазбаларымен расталды.

Сот шешімі бойынша, Т-ға 13 жылға бас бостандығынан айыру жазасы тағайындалды. Сонымен қатар, Т-дан қаза болған Юнусметовтің отбасының пайдасына материалдық және моральдық зиян ретінде жалпы сомасы 17 958 440 теңге өндірілді.

Г-ға қатысты бастапқыда бас бостандығын шектеу жазасы тағайындалғанымен, апелляциялық сот шешімімен ол 3 жылға бас бостандығынан айырылды.

Бұл үкім заңды күшіне енді.

Еске салсақ, Өскемендегі көшелердің бірінде болған жанжал кезінде қаза тапқан адам танымал спортшы Эльер Юнусметов болып шыққанын жазған едік.

Талқылау