"Ашық суреттерін ата-анасына жіберемін деген": Шымкентте екі полицей модель қыздарды бопсалап 300 мың теңге сұраған
Шымкентте екі экс-тергеуші модель қыздардың ашық суреттері мен видеоларын ата-анасына көрсетемін деп бопсалап, 300 мың теңге сұраған. Бұл туралы Stan.kz ақпарат агенттігі “Оtyrar” порталына сілтеме жасап хабарлайды.
Фото Polisia.kz
Полиция майоры мен лейтенанты сонымен қатар модельдік агенттіктің қыздарын түрмеге қамаймыз деп те қорқытқан. Олар бопсалаудан соң, пара алу барысында жеке кабинетінде ұсталды.
Сотта айыптаушы сотталушыларға нақты мерзім беруді талап еткенімен, полиция қызметкерлері отбасы мен кәмелетке толмаған балаларының барын алға тартып, бас бостандығынан айырмауын сұраған.
"Жаза тағайындау кезінде сот жеңілдететін мән-жайлардың болуын аңғарды. Олардың біреуінде төрт кішкентай бала, ал екіншісінің асырауында 2-топтағы мүгедек анасы бар. Сондай-ақ жәбірленушімен татуласу жайы да ескерілді. Алайда антты бұза отырып қылмыс жасағаны үшін сотталушылар кінәлі деп танылды", — деді Шымкент қаласының қылмыстық істер жөніндегі ауданаралық сотының баспасөз қызметі.
Сот шешімі бойынша полицейлер атағынан айырылып, әрқайсысына 10,5 миллион теңгеден айыппұл салынды. Одан бөлек, олар өмір бойы мемлекеттік ұйымдарда қызмет атқару құқығынан айырылды. Үкім заңды күшіне енді.