Төрт мекеменің ақшасын жымқырған: Атырау облысы денсаулық сақтау басқармасының орынбасарына қандай айып тағылғаны белгілі болды

Бұрынғы Атырау облыстық құрылыс басқармасы басшысының орынбасары Нұрқуат Нудинге мектепке, сондай-ақ екі медициналық мекеме мен дене шынықтыру-сауықтыру кешеніне бөлінген ақшаны жымқырды деген айып тағылды, деп хабарлайды Stan.kz ақпарат агентігі. 

"Қаржылық мониторинг агенттігінің Атырау облысы бойынша аумақтық департаменті "Атырау облысының құрылыс басқармасы" лауазымды тұлғаларына және "Техника-Рем строй" ЖШС басшысына қатысты әлеуметтік нысандар (мектеп, екі медициналық амбулатория, дене шынықтыру-сауықтыру кешені) құрылысына бөлінген аса ірі мөлшердегі бюджет қаражатын жымқыру фактісі бойынша сотқа дейінгі тергеу жүргізуде", – делінген хабарламада. 

ЖШС басшысына қатысты "күзетпен ұстау" түріндегі бұлтартпау шарасы қабылданған. 

"Осы қылмыстық іс аясында ҚІЖК-нің 128-бабы тәртібінде Атырау облысы құрылыс басқармасы басшысының бұрынғы орынбасары (қазіргі Атырау облысы Денсаулық сақтау басқармасы басшысының орынбасары) ұсталып, Атырау уақытша тергеу изоляторына қамауға алынды", - деп толықтырды қаржылық мониторинг агенттігі. 

Атырауда 10 ақпанда облыстық денсаулық сақтау басқармасы басшысының орынбасары Нұрқуат Нудин ұсталған болатын. Денсаулық сақтау басқармасы бұл фактіні растап, шенеуніктің ұсталуы – облыстық денсаулық сақтау саласындағы жұмысына байланысты емес екенін атап өткен.