"Неге асықтың": Қымбат Досжан марқұм Үсіпхан Сейтімбетке жан тебірентерлік жазба арнады
Белгілі тележурналист Қымбат Досжан 60-тан асқан шағында дүниеден озған Үсіпхан Сейтімбетті еске алды. Бұл туралы Stan.kz ақпарат агенттігі хабарлайды.
Фото: Видеодан скриншот
Диктор марқұмның асқан талантты болғанын айтты.
“Қош, Үсіпхан! Курсымыздың ең жайдарлы, жүрегі ақ, пейілі кең ақеділ азаматы едің. Пластика, ритм, музыкалық қабілетің бәрі-бәрі бір өзіңнен табылған талант едің. Ритмикадан емтихан тапсырғанымыз есіме түсіп отыр. Бос шыны бөтелкенің әрқайсына суды мөлшерлеп тұрып құйып, алюминий шанышқы, қасықпен ұра отырып, мен дирижерлік еткен “Смуглянка” әнін ансамбльмен тамаша сүйемелдеп едің. Ұрмалы аспаптарды ұрғылағанда тіпті жанатынсың. Неге асықтың?",– деп жазды журналист.
Сонымен қатар үзеңгілес болған достарына қазаға ортақ екенін жеткізді.
“Қымбатты менің курстастарым! Профессорлар: Асқар Тоқпанов, Шолпан Жандарбекова, Асанәлі Әшімов, Тілектес Мейрамовтың шәкірттері, баршаңызға қайғырып көңіл айтамын. Мұхтар Әуезов, Ғабит Мүсірепов театрларының ұжымына, Үсіпханның жары, курстасым, театр актрисасы Гүлнар Сейтімбетоваға, ұл-қызына, туған жақындарына көңіл айтамын. Алла панасына алсын Үсіпхан бауырымды", – деп мұңайды диктор.
Еске салайық, актердің қазасын театр ұжымы хабарлаған еді.