Назарбаев СІМ-де қажетсіз елшілердің тым көптігін сынға алды

Қазақстанның мүддесі бар елде  ғана Елшілік қажет. Бұл туралы бүгін Ақордада өтіп жатқан  ҚР Үкіметінің кеңейтілген отырысында елбасы Нұрсұлтан Назарбаев айтты.

Елбасы өз сөзінде елімізге инвестиция тарту мәселесімен айналысатын бір адам болуы керектігін, қажет болса, оған арнайы мәртебе беру керектігін атап өтті.

«Сыртқы істер министрлігі онсыз да осымен айналысуы тиіс. Басқа немен айналыспақ? Біз әлемдік саясат пен дипломатияны айқындайтын держава емеспіз», – деді ҚР Президенті.

Осы ретте Мемлекет басшысы қай елге барсаң да, елшілердің немен айналысатындығын білмейтіндігін сынға алды.

«Өз істерін, экономиканы тіпті де білмейді. Сондықтан да бағдар мынадай болуы керек. Бұл жайында біз министрлік кездесулерінде, алқа мәжілістерінде айтатын боламыз. Барлық жерде қажет болсын, болмасын елшіліктер негізсіз ұлғайтылған. Министрлікте мұндай елшілер қаншама? Ал біздергі қазіргі уақытта мұның қажеті жоқ. Біздерге қазіргі уақытта Қазақстанның мүддесі бар жерлерде ғана өкілдік қажет», – деді Н.Назарбаев.