Мыңдаған Airbus ұшақтарынан ақау анықталды: Енді кей рейстер кешігіп, кейбірі тоқтатылмақ

Фото: bloomberg.com

Airbus мыңдаған әуе кемесінде аспаптық қате бар екенін мәлімдеді. Бұл рейстердің кешігуі мен тоқтатылуына әкелуі мүмкін. Бұл туралы Stan.kz ақпарат агенттігі хабарлайды.

Еуропалық ұшақ өндіруші компания қуатты күн радиациясы ұшақты басқаруға қажет мәліметтерді бұрмалап жіберетінін хабарлады.

Бұл мәселе 30 қазанда АҚШ-тың Флорида штатында JetBlue әуе компаниясының A320 ұшағымен болған оқиғадан кейін анықталған. Әуе кемесі кенеттен биіктігін жоғалтып, шұғыл қонуға мәжбүр болған. Оқиға салдарынан кем дегенде 15 адам жарақат алды.

Қате Airbus-тың ең танымал моделі – A320, A318, A319 және A321 ұшақтарынан анықталды. Шамамен 6 000 әуе кемесі осы мәселеге тап болуы мүмкін. Ал оның ішінде 5 100 ұшаққа тек бағдарламалық қамтамасыз етуді жаңарту жеткілікті. Ескі үлгілер үшін қосымша аппараттық жабдықты ауыстыру қажет. Бұл оларды уақытша пайдаланудан шығаруды талап етеді.

Ұлыбританияның авиация саласын реттеуші органы бұл шаралар «кейбір рейстердің кідірісіне және олардың тоқтатылуына» әкелуі мүмкін екенін айтты.

Air Astana ұшақтары да кешігуі мүмкін

Airbus компаниясы өз ұшақтарына арналған бағдарламалық қамтамасыз етуді шұғыл жаңартып жатыр.

Ресми деректерге сүйенсек, FlyArystan-да 28 ұшақ бар. Бәрі Airbus.  Ал Air Astana -да 33 ұшақ болса, соның 30-ы Airbus.

“Air Astana тобы пайдаланатын Airbus ұшақтары қауіпсіздікті қамтамасыз ету мақсатында міндетті жаңартуды жүргізу үшін базалық әуежайларда кешіктірілетін болады. Air Astana ұшу кестесіне әсерін барынша азайту үшін барлық мүмкін шараларды қабылдап жатыр, дегенмен рейстер өзгеруі мен кешігуі мүмкін. Жолаушыларға өз рейстерінің мәртебесін әуе компанияларының сайттарынан алдын ала тексеріп отыру ұсынылады”, – делінген хабарламада. 

Қандай әуе компаниялары зардап шегеді?

Қазір бірқатар әуе компаниялары белгілі бір ұшақтарын уақытша пайдаланудан шығаратынын айтты. Олардың қатарында Wizz Air, Air India және Air New Zealand бар.

BBC басылымының мәліметінше, British Airways айтарлықтай зардап шекпейді.

EasyJet алдымен «бұл жағдай белгілі бір кідірістерге әкелуі мүмкін» екенін мәлімдеп, жолаушыларды тікелей хабардар ететінін жеткізді. Бірнеше сағаттан кейін компания көптеген ұшақтарына жаңарту орнатылғанын және 29 қараша қалыпты режимде ұшатынын хабарлады.

American Airlines 340 ұшағы жаңартылып жатқанын айтты. Жаартулардың басым бөлігі бүгін және ертең толық аяқталады деді.

Delta Airlines өндірушінің нұсқаулығын орындайтынын айтты. Алайда бұл жағдай олардың қызметіне айтарлықтай әсер етпейтінін жеткізді.

Сонымен қатар канадалық әуе компанияларының бұл мәселеден іс жүзінде зардап шекпейтіні белгілі болды. Air Canada бұл мәселе олардың жұмысына әсер етпейтінін мәлімдеді. Ал WestJet пен Porter көрсетілген модельдердегі ұшақтарды мүлдем қолданбайды.

“Жолаушылар өз рейстерінің осы өзгерістерге әсер ететін-етпейтінін әуе компаниясынан анықтауы тиіс. Рейс кешіккен жағдайда жолаушылардың құқықтары мен қауіпсіздігін қамтамасыз ету авиакомпаниялардың міндеті”, – деді Ұлыбритания Азаматтық авиация басқармасының авиациялық қауіпсіздік жөніндегі директоры Джанкарло Буоно.

Жоғары биіктікте қуатты күн немесе ғарыштық радиация ELAC компьютерінің жұмысына әсер етуі мүмкін. Бұл жүйе ұшақтың биіктік рулі мен элерондарын басқарады, яғни әуе кемесін жоғары, төмен бағыттауға немесе бұруға арналған аэродинамикалық бөліктерді.

A320 ұшақтар отбасы электродистанциялық басқару жүйесімен (fly-by-wire) танымал. Мұндай жүйеде ұшқыштар кабинадан ұшақтың басқару элементтеріне тікелей механикалық түрде ықпал ете алмайды. Ұшқыштың әрекеттерін электрондық жүйе қабылдап, өңдеп, соған сәйкес ұшақты басқарады.