Жақында ғана лифт камерасына түсіп қалған видео әлеуметтік желіні шулатқан еді. Кабинаға кірген ер адам бар ашуын басқару панелінен алған. Ер адамға әкімшілік айыппұл салынды. Кейін ол кешірім сұрап, өзінің бұл қылығын інісінің қазасымен байланысты екенін айтты.
"Алмалы ауданы тұрғындарынан 1 қарашадағы әрекетім үшін кешірім сұраймын. Келтірілген шығынды өтеуге дайынмын. Енді мұндай әрекет жасамауға уәде беремін", – деді ол видеода.

Бейнебақылау камералары көбейгелі осы тектес жағдайлар жиі тіркеле бастаған. Адамдар қоқыс жәшігі, автокөліктер, шағын архитектура мүсіндері мен ескерткіштерді және үйлер қабырғасын бүлдірген. Психологтар пандемиядан кейін вандалдар саны көбейгенін айтады.

"Біз көріп жүрген агрессия – “толып қалған ыдыс”. Оған өте көп жағымсыз нәрселер жиналып қалған, енді олар төгіліп жатыр. Ал жағымсыз нәрсе дегеніміз не ? Өзіне көңілі толмау, өміріне, тұрмыстық жағдайына қанағаттанбау. Сол себепті қолда бар нәрсені сындыру арқылы агрессияны сыртқа шығарады. Мақсат – өзгенің назарын аударту", – дейді мамандар.

Ашуды басу үшін мамандар іштей онға дейін санау керек немесе 10 рет терең тыныстауға кеңес береді. Бұған қоса, бос уақытыңызда қала сыртына шығып, айқайлаған дұрыс. Егер ештеңе көмектеспесе, психологтің көмегін алыңыз. Ашу-ызаны басып қалудың қажеті жоқ дейді психолог. Өзгеге зиян тигізудің орнына жаттығу залына, бассейнге, караокеге барыңыз. Сонымен қатар дұрыс ұйқы да ашуды жеңуге септігін тигізеді.

Талқылау