Коронавирусқа қарсы препараттардың жанама әсері бар: Дәрігер инфекцияның зардаптары туралы айтып берді
Медицина ғылымдарының докторы жоғарғы санатты дәрігер Раушан Жомартқызы Қарабаева коронавирусқа қарсы дәрі-дәрмектің жанама әсері бар екенін айтып, вирустың ауыр зардаптарын түсіндірді, деп хабарлайды Stan.kz ақпарат агенттігі.
Орталық коммуникациялар қызметінде өткен брифинг барысында Раушан Жомартқызы үй жағдайында коронавирустық инфекцияны емдеудің негізгі тәсілдеріне тоқталды.
"Коронавирус инфекциясынан өздігінен емделу мәселесіне тоқталғым келеді. Біз қазір симптомды және аз симптомды науқастардың үйде емделуін айтып жатырмыз. Дәрігерлер ондай науқастардың емін реттеуі керек. Аз симптомды ауруы бар науқастар вирусқа қарсы және антибактериялық препараттарды қолданбауы керек. Ондай науқастар ақуызы көп тамақты ішіп,сұйықтықты көп тұтынып, С, D витаминдерін қолдану керек.Температура көтерілген жағдайда парацетамол немесе ибуфен ішу керек", - деп түсіндірді дәрігер.
- Коронавирус пандемиясы әлі өз шыңына жеткен жоқ - ДДСҰ басшысы
- Қарағанды облысының әкімі коронавирустан болған өлім санының күрт өсуін түсіндірді
Оның сөзінше, дәрі-дәрмекті мамандардың нұсқауынсыз қолдансаңыз, арты ауыр зардаптарға алып келуі мүмкін. Коронавирустан емдейтін препараттарды мөлшерден тыс, немесе қажет емес жағдайда ішудің өзіндік салдары бар.
"Витаминді көп мөлшерде қолдану өкпенің ауруларын асқындырып жібереді. Қызу 38 градустан жоғары болып, токсикацияның симптомдары пайда болса, пневмонияның өршуін болдыртпай, дереу дәрігерге көріну қажет. Коронавирус індеті кезінде вирусқа қарсы препараттар жазылады. Мәселен, лопинавир, ремдесивир,фавипиравир және гидрокси-хлорофилл. Алайда бұл препараттардың салдары туралы да ұмытпаған жөн. Симптомсыз науқастар бұл препарттарды қолданбауы тиіс. Бұл дәрілер тек дәрігердің тағайындау бойынша қолданылу керек", - дейді Раушан Жомартқызы.