"Консерваториядан кісен салып алып кетті": Бауыржан Исаев өнеріне түрлі тосқауыл болғанын жасырмады

Белгілі әнші Бауыржан Исаев өнер жолындағы көрген қиындықтарын баяндап берді. Бұл туралы Stan.kz ақпарат агенттігі хабарлайды.

Фото: www.instagram.com/bauyrzhan_issayev_official/ 

Өнер иесі “Хабарlike” бағдарламасында қонақта болып, осыдан 25 жыл бұрынғы оқиғаларын есіне алды. 

“Жалпы өнер жолы – ауыр жол. Сахнаға шығармай қойған кезін былай қойғанда, кісен салып алып кетті. Қылмыстық іс те қозғалған еді. Консерваториядан кісен салып, алып кеткен кездер де болды. Сөздің ашығы, оны халық білмейді. Алматының Ішкі істер департаментінде отырдық. Сол кезде бір ағамыз алып шыққан. Ол сынақтан да өттік", – деп бір құпияның шетін шығарды. 

• Алматы облысында жантүршігерлік қылмыс жасаған азамат өмір бойына бас бостандығынан айырылды

• Жұлдыздар көтерілісі: Бір топ қазақстандық әнші сазгерсымаққа алданып, оған іздеу жариялады

Әншінің айтуынша, 2000 жылдары әншінің шығармашылығына шектеу қойылып, сахнадан шеттетілген көрінеді.

“Бүгін алғаш рет айтайын деп жатырмын. Бұл ақпаратты сіздерге жеткізгім келеді. Негізі 2000 жылдары менің шығармашылығыма ресми түрде шектеу қойылған еді. Ол кісілердің атын атамай-ақ қойсам да болады. Ол кісілер осы бірнеше жыл бұрын дүниеден озды. Сол кезде ресми түрде Бауыржан Исаевтың шығармашылығына шектеу қойылып, тыйым салынған. Бүкіл өңірде облыстық әкімдерге хабарласып, менімен жұмыс істемеуді бұйрық ретінде шығарған еді. Cол үшін мені концерттерге шақыруды қойды, одан бөлек бүкіл Қазақстандағы радиолардан, теледидардан менің әндерімді, бейнебаяндарымды алып тастаған", – деді өнер иесі. 

Өнер иесі пандемия кезінде әншілердің таксист болып жұмыс істегенін айтқан еді.