Қазақстандағы ірі такси сервистеріне жаңа бәсекелес: Bolt компаниясы нарыққа кіреді

Фото: pixabay.com

Үкіметте өткен баспасөз мәслихатында көлік министрі Нұрлан Сауранбаев Қазақстанның такси нарығында қандай өзгерістер болатынын айтты. Бұл туралы Stan.kz ақпарат агенттігі хабарлайды.

БАҚ өкілдері бұрынғы көлік министрі Марат Қарабаевтың тарифтерді ғана емес, такси нарығының өзін де реттеу қажеттігі туралы ұстанымы болғанын еске салды. Осыған байланысты журналистер көлік министрлігінің жаңа басшысынан осы тұрғыдағы ұстанымы мен қандай өзгерістер күтуге болатынын сұрады.

"Министр ауысқанымен, министрліктің ұстанымы өзгерген жоқ деп ойлаймын. Министрлік жолаушылардың қауіпсіздігі үшін жұмыс істеуге жағдай жасаумен айналысады. Соңғы шешім Альфард сияқты оң рөлді көліктерге қатысты қабылданды. Мұндай шешімді біз қабылдаймыз. Ал компаниялардың баға саясатына келетін болсақ, онымен Бәсекелестікті қорғау және дамыту агнеттігі айналысады. Ол мәселелерге араласуға өкілеттігім жоқ. Бәсекелестікті қорғау және дамыту агнеттігі өз тарапынан "Яндекс" және басқа да компаниялармен меморандумға қол қойды", – деді Нұрлан Сауранбаев.

Оның пайымдауынша, бағаны реттеу үшін нарыққа қосымша компаниялар енгізу керек, халықтың таңдауы болуы үшін қазірдің өзінде келіссөздер жүргізілуде.

Осы орайда журналистер бірқатар компания Қазақстан нарығына кіруге талпынғанын, бірақ бәсекелестікке байланысты одан шығып кеткенін атап өтті. Осыған байланысты БАҚ өкілдері көлік министрінен "Отандық такси агрегаторы пайда болуы мүмкін бе?" деп сұрады.

"Қытайлық Didi қанша сомамен кіргенін білесіз бе? Нарықты сынап көру үшін олар бағаны төмендетіп, жүргізушілерге солардың қызметі арқылы тасымалдау үшін қосымша ақы төледі. Жүздеген миллион доллар. Айтпақшы, өңірлерде жеке қазақстандық компаниялар жұмыс істейді, бірақ Алматы мен Астанада – ірі ойыншылар. Бүгінде Балтық жағалауы елдеріндегі Bolt компаниясы нарыққа кіріп жатыр. Олар самокаттардан бастап, таксиге көшеді. "Яндекспен" қазір InDrive бәсекеге түсе бастады, бірте-бірте қысып жатыр. Баға параметрлерін есептемесек, әрине, "Яндекс" қазір үздіктердің бірі саналады. Жақында өзім жүріп көрдім, бағасы қымбат, келісемін. Бірақ біз бағаны реттемейміз, ол біздің құзыретімізге кірмейді", – дейді министр.