Фото: Reuters
"Қытай АҚШ-ты біржақты тарифтік шараларды дереу алып тастап, сауда саласындағы келіспеушіліктерді тең, өзара құрмет пен тиімділік негізінде келіссөздер арқылы шешуге шақырады", — делінген Қаржы министрлігінің мәлімдемесінде.
Сонымен қатар Barron’s басылымы министрлікке сілтеме жасай отырып, Қытай АҚШ-тың экспортына қатысты жоғары баж салығына байланысты Дүниежүзілік сауда ұйымына (ДСҰ) шағым түсіргенін хабарлады. Мұндай шараларды Бейжің Трамп әкімшілігінің 2018 жылы және оның қазіргі президенттік мерзімінің басында қабылдаған әрекеттеріне жауап ретінде де қолданған еді.
CGTN мәліметінше, Қытай ұлттық қауіпсіздік пен ел мүддесіне қауіп төндіретін 16 америкалық компанияны экспорттық бақылау тізіміне қосты. 4 сәуірден бастап Қытай осы компаниялармен қосарлы мақсаттағы өнімдер жеткізілімі бойынша ынтымақтастықты тоқтатады. Осылайша, Қытай тауарлары АҚШ-қа 54% жалпы тарифпен жеткізілсе, АҚШ өнімдері Қытайға 34% баж салығымен экспортталмақ.
Қытайдың бас кеден басқармасының мәліметінше, Трамп жарлығындағы жеңілдіктерді есепке алмағанда, Қытайдан АҚШ-қа экспортталатын тауарларға салынатын баж салығы 283,3 миллиард доллар, ал АҚШ-тан Қытайға — 55,6 миллиард долларға шамалас.
Бұл көрсеткіштер арасындағы бес еседен астам айырмашылық тек тариф мөлшеріне емес, сонымен қатар Қытайдың АҚШ-қа экспорт көлемінің (524,7 миллиард доллар) АҚШ-тың Қытайға экспортынан (163,6 миллиард доллар) үш еседен астам көп болуына байланысты.
Дональд Трамп өзінің алғашқы президенттік мерзімі кезінде Қытайдан импортқа салынатын баж салығын бірнеше рет арттырды: 2017 жылғы қаңтарда президент қызметіне кіріскен кезде 3% болған орташа мөлшер, 2019 жылдың соңына қарай 20%-дан асты.
Еске салайық, бұған дейін АҚШ президенті Дональд Трамп Ақүйде өткен баспасөз мәслихатында 180-нен астам елге жаңа сауда тарифтерін енгізетінін мәлімдеді. Олардың қатарында Қазақстан және бұрынғы Кеңес Одағының басқа да мемлекеттері болғанымен, тізімде Ресей жоқ. Айта кету керек, Қазақстан жоғары тарифтер енгізілген елдердің қатарында. Қазақстанға осы өңірдегі ең жоғары мөлшерлемелердің бірі – 27% белгіленді.