KeshYOU-дің мерейтойлық концертіне Мөлдір шақыртылмаған
2016 жылы KeshYou тобына 10 жыл толады. Осыған орай топтың продюсері Баян Есентаева үлкен жеке концерт беруді жоспарлап отыр. Концертке дайындық қазірден басталып кеткен, себебі оларға топ ғұмырындағы барлық әндерді орындау бұйырып тұр.
Бұл туралы НТК арнасы хабарлайды.
Ең алғашында топ Әнел Әрінова, Зумрад Гараева және Мөлдір Әуелбековадан тұрған. 2008 жылы Зумрадтың орнына Наиля Заитова келеді.
2010 жылы оның орнын Кәмшат Жолдыбаева басады.
2012 жылы топқа Айдана Меденова мен Жанар Дұғалова келеді. Дәл осы құрамды көпшілік «Алтын құрам» деп атап кеткен.
Жаңадан келген әнші қыздар топтың атағын дүркірете алмай жүр. Дегенмен, қыздар барынша тырысып-бағуда. Жеке концертке Жұлдыз, Балжан мен Ақбота күнделікті дайындалып жатыр.
Бұған дейін тыңдармандары жаңа құрамның жұмысын көп сынаған еді. Топтың музыкалық продюсері Бағым Мухиденова желідегі дайындықты сынаудың қажеті жоғын айтқан еді. Себебі, бұл қыздар бұған дейінгі құрамнан асып түспесе кем емес деген продюсер олардың өнерін концертте тамашалауға кеңес берген еді.
Жеке концертке, сонымен қатар, «Алтын құрамның» қыздары да қатысады деп жоспарланып отыр. Алайда бірінші құрамнан тек Әнел Әрінова шақырылған.