Қазақстандық төрт боксшы қыз Азия біріншілігінің жартылай финалына жолдама алды
Фото: Қазақстан бокс федерациясы
Таиландта өтіп жатқан 19 жасқа дейінгі жастар арасындағы бокстан Азия чемпионатында қазақстандық қыздар өз шеберліктерін жоғары деңгейде көрсетіп, жартылай финалға шықты. Бұл туралы Stan.kz ақпарат агенттігі хабарлайды.
Бұл нәтижемен олар кем дегенде қола жүлдені қоржынға салды.
60 келіге дейінгі салмақ дәрежесінде сынға түсіп жатқан қазақстандық боксшы Алина Құдайгенова кезекті жекпе-жегін жеңіспен аяқтады.
Ширек финалда отандасымыз Оңтүстік Корея өкілі Джихе Хонгпен жұдырықтасты. Тартысты өткен үш раундтың қорытындысы бойынша төрешілер 4:1 есебімен Құдайгенованың пайдасына шешім шығарды.
57 келіге дейінгі салмақта сынға түскен Аяжан Ермек тай спортшысы Чавалук Соннуммен жекпе-жек өткізіп, сенімді жеңіске жетті. Жекпе-жектің алғашқы бөлігінде қарсыласы белсенділік танытқанымен, Ермек дәл соққысымен оны нокдаунға түсірді. Бұл сәттен кейін қазақстандық боксшы толықтай басымдыққа ие болды. Екінші раундта жылдамдық пен қозғалыстың арқасында ол қарсыласынан үстем түсті. Соңғы раундта Аяжан тағы да екі мәрте қарсыласын нокдаунға жіберіп, төрешілердің бірауызды шешімімен жеңіске жетіп, жартылай финалға өтті.
54 келіге дейінгі салмақта Жанель Имантаева Оңтүстік Кореялық Цзяэ Киммен қолғап түйістірді. Бірінші раундтан бастап-ақ тартысты өткен кездесуде Имантаева қарсыласынан бір саты жоғары көрінді. Екінші раундта екі боксшы жақын қашықтықта ашық айқасқа көшті, бұл жерде Жанельдің дәл соққылары артықшылығын көрсетті. Соңғы үш минуттықта корей боксшысы алға ұмтылып, шабуылдауға тырысты, алайда қазақстандық спортшы қарсы шабуылдар арқылы ұтымды жауап қайтарып отырды. Жекпе-жек нәтижесінде төрешілердің шешімімен Имантаева келесі кезеңге өтті.
51 келіге дейінгі салмақта өнер көрсеткен Айым Таңқыбаева Моңғолияның өкілі Сувд-Эрдене Баянмунамен кездесіп, айқын басымдықпен жеңіске жетті. Бірінші раундта Айым қарсы шабуылмен жұмыс істеп, тиімді соққылармен көзге түсті. Екінші раундта ол қарсыласын нокдаунға жіберді. Соңғы раундта да толық бақылауды өз қолында ұстаған қазақстандық боксшы жеңісті жұлып алды. Төрешілер бірауыздан Айымды жеңімпаз деп таныды.
Осылайша, Аяжан Ермек, Жанель Имантаева және Айым Таңқыбаева Азия чемпионатының жартылай финалында бақ сынап, ел құрамасына жүлде әкелуге бір қадам жақындады.
Айта кетейік, бұған дейін 22 жасқа дейінгі жасөспірімдер арасындағы Азия чемпионатында Нұрислам Қалдыбаев (60 келіге дейін) пен Илья Калинин (65 келіге дейін), сондай-ақ Нұрбек Мұрсал (70 келіге дейін) жартылай финалға жолдама алған болатын.
Әкімдік қаладағы ескі брусчаткалардың мұқтаж отбасыға берілгенін айтты: Алайда Боқаев төсеуіштің жеке қолға сатылып жатқанын түсіріп алған (видео)
