Қазақстандық депутатқа 2070 жылға дейін Ресейге кіруге тыйым салынды
Мәжіліс депутаты Айдос Сарым Ресейге барса, 7 жылға бас бостандығынан айырылуы мүмкін. Бұл туралы Stan.kz ақпарат агенттігі хабарлайды.
Фото: parlam.kz
Депутат ресейлік журналист Тина Канделакиді Қазақстанға кіргізбеу туралы шешім өте орынды екенін жеткізді.
"Сыртқы істер министрлігі Тина Канделакиді нон-грата персонасы деп жариялады. Бұл –дұрыс шешім. Ол үшін сөз ысырап етіп, эмоцияға берілудің қажеті жоқ. Өзіңізді құрметтеуге тиіссіз. Мен де Ресейде 2070 жылға дейін нон-грата персонасы саналамын. Шекарадан өтсем, федералдық қауіпсіздік қызметі 7 жылға дейін қылмыстық жауапкершілікке тартады. Беларуссияда да солай... Ешкім ештеңе түсіндірмеді". – деп жазды депутат.
Айта кетейік, бұған дейін ресейлік журналист Тина Канделаки Telegram-арнасына жазба жариялап, “Қазақстан орыс тілін мемлекеттік деңгейде ығыстырып жатыр" деп айыптаған еді. Оның бұл айыптауына журналист Динара Сәтжан жауап берді.
Сондай-ақ Тина Канделакиге осы мәлімдемесінен соң Қазақстанға кіруге тыйым салынған.