“Көпбалалы анамын. Төрт балам бар. Қазір декреттемін. Азық-түлікті апта сайын жеткізу үшін Kaspi.kz қосымшасындағы Magnum қызметін қолданамын. Бүгін қызық жағдай болды. Үнемі тапсырыс беретін өнімдердің де бағасын жатқа білемін. Мұнда балаларға арналған ботқаға салатын сары май бағасы бұрын 2466 теңге еді. Бүгін баға 3178 теңге деп тұр. 712 теңге айырмашылық бар. Демек бағасы 29% қымбаттаған”, – дейді әйел.

Сондай-ақ ол бағаның күрт көтерілуіне не себеп болғанын сұрады. Әлі қосылған құн салығы мөлшерлемесі көтерілген жоқ, бұған не себеп дейді әйел.

@katya_alafi @Magnum.kz дайте пояснение с чем связанно такое повышение на ТОВАРЫ НАРОДНОГО ПОТРЕБЛЕНИЯ?!? #казахстан #каспи #магнум #ндсказахстан #ндс ♬ оригинальный звук - KATYA_ ALAFI

Желі қолданушылары да әйелдің сөзін қуаттап, Қазақстанда сары май ғана емес, бәрі қымбаттады дейді.

“Magnum-ға бармаймын. Ондағы бағалар тым жоғары”, “Сізге бір үлкен құпия айтайын. Қазақстан халқының жартысы тек тамақ үшін жұмыс істеп жүр. Тіпті кейде алған жалақысы да жетпейді”, “Халықтың қалтасын осылай тонайды. Ал тұрғындар бағаға мән бермей сатып ала береді”, “Май ғана емес, бәрі өсіп жатыр. Не үшін қымбаттап жатқанын ешкім түсіндірмейді”, “Француз маргарині де қымбаттап кетті. Бізге сары май өндіретін жерді табу керек”, “Дүкенде 19 жылдан бері жұмыс істеп келе жатырмын. Жылда қаңтар айынан бастап бағаны көтереді”, “Қосылған құн салығының мөлшерлемесін көтеру туралы шешім 2025 жылдың 31 желтоқсанында қабылдануы мүмкін. Бірақ салық органдары шот бойынша айналымды жыл басынан есептейді”, – деп жазды желі қолданушылары.

Аталған жағдайға қатысты Stan.kz тілшісі Сауда және интеграция министрлігінен мән-жайды сұрап білді.

Министрлік мәліметінше, кәсіпкерлік кодексіне сәйкес, кез келген кәсіпкер бағаны нарыққа сүйене отырып, өзі белгілейді.

“Дегенмен азық-түлік тауарларының ішінде әлеуметтік маңызы бар өнімдер бар. Оның ішіне 19 тауар түрі кіреді. Осы тауар түрлерінің саудасына Сауда комитеті мемлекеттік бақылау жүргізеді. Мәселен, Magnum сауда желісі бұл сары майды басқа өндірушіден немесе жеткізушіден сатып алғаннан кейін оған 15% cауда үстемесін қоса алады. Егер одан жоғары сауда үстемесін қосса, шағын не орта бизнес екеніне қарап әкімшілік жауапкершілікке тартылады”, – делінген министрлік хабарламасында.

Сондай-ақ министрлік Ұлттық статистика бюросы ұсынатын ресми мәліметтерге сүйенетінін жеткізді.

“Ұлттық статистика бюросы елдегі азық-түліктің орташа бағасына мониторинг жүргізеді. Ұлттық статистика бюросы 18 ақпанда ұсынған мониторингке сүйенсек, Қазақстанда сары майдың 1 келісінің орташа бағасы 4 489 теңге. Ал Астана бойынша орташа баға 5 348 теңге. Ал Алматыда 4 329 теңге. Айта кетерлігі, маркетплейстегі баға мен сөредегі бағаның айырмашылығы жер мен көктей. Себебі дүкенде өз өзіңізге қызмет етесіз. Азық-түлікті өзіңіз таңдап алып, өзіңіз алып қайтасыз. Ал маркетплейсте осы қызметтің барлығы сол бағаның ішіне қосылатынын халық ескеруі қажет”, – делінген хабарламада.

Бұл жағдайға қатысты Magnum сауда желісінен бағаның күрт көтерілуіне не себеп болуы мүмкін екенін сұрадық. Дегенмен сауда желісі ақпан айында жіберген сұратым хатымызға сол күйі жауап бермеді.

Талқылау