Қазақстандағы ескі университеттердің бірі лицензиясынан айырылып қалды

ҚР БҒМ Білім және ғылым саласындағы сапаны қамтамасыз ету комитеті М.Тынышпаев атындағы Қазақ көлік және коммуникация академиясын бас лицензиясынан айыру туралы шешім қабылдады. Шешім 10 жұмыс күні өткеннен кейін заңды күшіне енеді, кейін жоғары оқу орны білім беру саласындағы қызметін тоқтатуға міндетті болады, деп хабарлайды Stan.kz ақпарат агенттігі.

Жыл бойы академияда жоспарлы және жоспардан тыс тексерулер жүргізіліп, білім беру саласындағы өрескел бұзушылықтар анықталды. Атап айтқанда, оқу процесі профессорлық-оқытушылық құраммен, өндірістік практика базаларымен, оқу-әдістемелік және ғылыми әдебиеттермен қамтамасыз етілмеген. Білім беру бағдарламалары жұмыс берушілердің сұранысына толық сәйкес келмеді, бұл түлектердің жұмысқа орналасуына да әсер етті. "Атамекен" ҚР ҰКП жүргізген рейтинг бойынша академияның білім беру бағдарламаларының шамамен 60% жұмыс берушілердің талаптарына сәйкес келмейді.

Бұған дейін білім және ғылым министрлігіне осы университетте «оқыған» шетелдік студенттер де жүгінген болатын. Олар оқудың ақысын төлеген, бірақ іс жүзінде академияда "оқымаған" болып шықты. Материалдар тиісті құқық қорғау органдарына жіберілді.

"Біз академия иелері қарсылық танытуы мүмкін екенін түсінеміз. Олар Комитеттің шешіміне сот тәртібі бойынша шағымдануға құқылы. Біз Мемлекет басшысының сапалы білім беруді қамтамасыз етпейтін жоғары оқу орындарын жабу бойынша қойған міндеттерін іске асыруға тиіспіз. Бірінші кезекте, студенттердің сапалы қызмет алу құқықтары мен мүдделерін ескеріп жатырмыз. Оларға алаңдауға еш себептері жоқ. Білім алушылар сол қаладағы басқа жоғары оқу орындарына грантын сақтай отырып, ауыса алады, сондай-ақ ақылы негізде оқығандар үшін де оқу құны артпайды. Ауысу үшін оларға семестрдің аяқталуын күтудің қажеті жоқ, біз қазірден бастап басқа ЖОО ауысуға рұқсат бердік. Сонымен қатар студенттердің оқу нәтижелері де сақталады және ауысып барған жоғары оқу орнында ескеріледі. Бұған дейін 35 мың студенті бар жоғары оқу орны жабылғанда, барлық студенттерді басқа оқу орнындарына ауыстыру бойынша жұмыс атқарған болатынбыз, яғни мұндай тәжірибе бар. Профессорлық-оқытушылық құрамды жұмысқа орналастыру бойынша да жұмыс жүргізілетін болады", - деп атап өтті білім және ғылым саласындағы сапаны қамтамасыз ету комитетінің төрайымы Гүлзат Көбенова.

Қазіргі уақытта  М.Тынышпаев атындағы Қазақ көлік және коммуникация академиясында 5 мыңнан астам адам оқиды.

Академияда оқу құны – білім беру бағдарламасына байланысты 427 мың теңгеден бастап 1,5 млн теңгеге дейін.

"Қазақ көлік және коммуникация академиясына қатысты түскен шағымдар бір жылдың көлемінде толастаған емес. Академияның 30-шы жылдардан бастау алған тарихына қарамастан, университет басшылығы оқу орнын осы жағдайға жеткізді. Кезінде дәл осы жоғары оқу орны теміржол саласын сапалы кадрлармен қамтамасыз еткен болатын. Өкініштісі сол, қазіргі таңда бұл білім ордасында болашақ мамандарды тиісті деңгейде даярлау бойынша түйткілді мәселелер жетерлік. Мұндай жағдай елдің экономикасы үшін стратегиялық маңызды саласына маман дайындау барысында орын алмауы тиіс. Білім беру бағыттары ұқсас оқу орындарының күш-жігерін біріктіру қажет шығар", - дей келе, жоғары оқу орындары қауымдастығының президенті Рахман Алшанов сала мамандарын даярлауды сақтап қалудың маңыздылығын атап өтіп.

Академиядағы бакалавриаттың 8 бағыты, магистратураның 6 бағыты, докторантураның 4 бағыты бойынша лицензиялар Алматы қаласының басқа 30 жоғары оқу орнында бар.

"Материалдық-техникалық инфрақұрылымның және білім беру процесін жүзеге асыруға салынған инвестициялардың болуын ескере отырып, Қазақ көлік және коммуникация академиясы базасында мектеп немесе колледж құру туралы ұсынысты қарастыруға болады. Сондай-ақ олар қаладағы басқа да ұқсас бейіндегі жоғары оқу орындарымен біріге алады", - дейді Гүлзат Көбенова.

Жоғары оқу орнының тарихы 1931 жылы Түркістан - Сібір теміржолы үшін кадрлар даярлау үшін Алматыда теміржол, механикалық және пайдалану мамандықтары бар Орта Азия теміржол инженерлері институтының филиалы ашылғаннан басталады.

1957 жылы бұл филиал оқу-консультациялық орталыққа айналды.

Көрсетілген оқу-кеңес беру орталығы 1967 жылдың 1 қазанынан бастап ТашИИТ-тің Алматы филиалы болып қайта құрылды.

1976 жылы 20 мамырда филиал негізінде Алматы теміржол көлігі инженерлері институты құрылды.

1991 жылы 1 қаңтарда Өскемен жол-құрылыс институтының Алма-Ата филиалы негізінде Алма-Ата автомобиль-жол институты құрылды.

1996 жылы 7 мамырда екі көліктік білім беру мекемесі - Алматы теміржол инженерлері институты және Алматы автомобиль-жол институты негізінде республиканың көлік индустриясы үшін мамандар даярлайтын кеңейтілген жоғары оқу орны - Қазақ көлік және коммуникация академиясы (ҚазАТК) құрылды.

2000 жылы 23 мамырда Қазақ көлік және коммуникация академиясына алғашқы қазақстандық теміржол инженері, көрнекті қоғамдық және саяси қайраткер, жобаны жасаушылардың бірі және Түркістан-Сібір теміржолының құрылысшысы Мұхамеджан Тынышпаевтың есімі берілді.

Талқылау
Пікір
Қазір оқып жатыр
Çàãðóçêà...
Қазір оқып жатыр