Қазақстанда жол апатынан адам қаза болған жағдайда сақтандыру төлемін екі есе арттыру ұсынылды

Фото: Ru.freepik.com

Қазақстанда жол-көлік оқиғасынан адам қаза болған жағдайда сақтандыру төлемдерін екі есе арттыру жоспарлануда. Мәжілісте заң жобасы бүгін ұсынылды. Бұл туралы Stan.kz ақпарат агенттігі хабарлайды.

Заң жобасын депутат Нартай Сәрсенғалиев таныстырды. Ол қазіргі уақытта адамның өмірін сақтандырған жағдайда және ол жол-көлік апатында қаза болса, максималды сақтандыру төлемі шамамен 7 миллион теңге екенін айтты.

Депутаттар осы соманы екі есе көбейтуді ұсынады. Мәжіліс депутатының айтуынша, заң жобасын үкімет қолдаған.

"Қазір біз осы соманы екі есе арттыруды талап етеміз. Егер ересек адам қаза болса, сақтандыру компаниясынан төленетін төлем 15 миллионға жетуі тиіс. Сондай-ақ жол-көлік апаты салдарынан мүгедек болған адамдарға төлемдерді де екі есе арттырамыз", - деді ол.

Атап айтқанда, бірінші топтағы мүгедектерге төлем 1 600 АЕК-тен 3 200 АЕК-ке дейін өседі. Бұл шамамен 12,5 миллион теңге. Екінші топ үшін төлем 1 200-ден 2 400 АЕК-ке (9,4 миллион), үшінші топ үшін 500-ден 1 000 АЕК-ке (3,9 миллион) көбейтіледі.

• Қазақстанда жол апатынан зардап шеккендерге берілетін сақтандыру төлемі екі есе артады

• Елімізде жол апатынан көз жұмғандардың мұрагерлеріне сақтандыру төлемін төлеу ұсынылды

Депутат заң жобасы бойынша қаза болған адамның туыстарына да төлем берілетінін атап өтті. Қазір егер қаза болған ересек адамның кәмелетке толмаған балалары болмаса, сақтандыру төлемі көбіне төленбейді.

Жаңа заң жобасында бұл норма өзгертіледі. Адам қаза болған жағдайда төлемді балаларының бар-жоғына қарамастан оның жұбайы немесе ата-анасы алады.

Нартай Сәрсенғалиевтің айтуынша, көлік жүргізушілерін де ескеру маңызды. Көліктің түрлері көп, қымбат көліктерде бір фараның өзі 1-2 миллион теңге тұруы мүмкін. Осындай жағдайда төлемдермен сақтандыру компаниялары айналысады.

"Қазіргі төлем өте аз. Сондықтан азаматтар шығынды жабу үшін несие алады, өйткені сақтандыру төлемдері жеткіліксіз. Адамдар өз қаражаты есебінен қосымша төлейді. Қазір максималды төлем 600 АЕК, бұл шамамен 2 350 000 теңге. Біз бұл соманы екі есе арттыруды ұсынамыз, сонда максималды төлем 4 718 000 теңге болады",  - деді депутат.