Қазақстанда мұнай бағасы құлдыраған кезде басымдық танытатын салалар анықталды
ҚР премьер-министрі Асқар Мамин үкімет отырысында ішкі және сыртқы сұранысы бар өндірістерге баса назар аударылуы керек екенін айтты, деп хабарлайды Stan.kz ақпарат агенттігі.
"Соның ішінде жеңіл, тамақ және химия өнеркәсібі, машина жасау және фармацевтика. Шыны, керамика, санитарлық-техникалық бұйымдарды қоса алғанда, отандық құрылыс материалдарының өндірісін кеңейту қажет", - деді Мамин.
Үкімет басшысы көмірсутегі шикізатына әлемдік бағаның төмендеуі басты назарды технологиялық күрделі салаларға көшуге аударып отырғанын атап өтті. Бұл мұнай химиясы және газды өңдеу саласына қатысты.
"Осыған байланысты мен индустрия министрлігіне мемлекеттік органдармен және әкімдіктермен бірге ағымдағы жылға жоспарланған барлық жобаларды жүзеге асырып қана қоймай, сонымен қатар индустрияландыру картасы жобаларының пулын қосымша өңдеп, кеңейтуді, мүмкін болатын жаңа жобаларды әзірлеуді тапсырамын", - деді Мамин.
Премьер-министр ең көп капиталды қажет ететін жобалардың Қарағанды, Ақтөбе, Алматы, Жамбыл, Павлодар облыстары мен Алматыда жүзеге асырылып жатқандығына назар аударды.
"Қалған аймақтар ағымдағы жобалардың іске асырылуын күшейтуі керек. Индустрияландыру картасының жобалары үшін әкімдер жеке жауап береді", - деді Мамин.