Қазақстанда ипотека бойынша пайыздық мөлшерлеме төмендей ме - Ұлттық банк төрағасы жауап берді

Фото: Ұлттық банктің баспасөз қызметі

Ұлттық банк төрағасы Тимур Сүлейменов Қазақстандағы ипотеканың жылдық сыйақы мөлшерлемесін төмендету мәселесіне қатысты пікір білдірді. Бұл туралы Stan.kz ақпарат агенттігі хабарлайды. 

Ұлттық банк төрағасы қолданыстағы ипотека мөлшерлемелері "тым жоғары" екенін мойындады. 

"10-15-20 жылға берілетін ипотека бойынша 25%-дық мөлшерлеме – өте жоғары көрсеткіш. 25%-бен тіпті 10 жылға алсаң да, артық төлем орасан зор болады. Мұндай төлемді қазақстандықтардың көтере алу-алмауы – үлкен мәселе", – деді Тимур Сүлейменов. 

Сүлейменовтің айтуынша, Ұлттық банк әлі күнге дейін өткен онжылдықтың ортасында берілген валюталық ипотеканың салдарын "реттеп жатыр".

"Біз әлі күнге дейін сол кезде валюталық кірісі жоқ адамдарға берілген ипотекалық несиелердің зардабын тартып отырмыз. Сондықтан ипотека – өте күрделі әлеуметтік-қаржылық құрал, оған толық дайындықпен келу қажет", – деді Ұлттық банк төрағасы. 

Жаңа Салық кодексі: Қазақстанда пәтер сату қиын әрі қымбат болады

Тимур Сүлейменовтың айтуынша, жуырда несие мөлшерлемесін 25%-дан 20%-ға дейін төмендету мәселесі қаралған.

"Мүмкін, қосымша зерттеу жүргізу, бастапқы жарнаны арттыру немесе басқа да қосымша шарттар қажет болар. Сонда мөлшерлемені сәл төмендету мүмкіндігін қарастыруға болады", – деді Сүлейменов.

Сонымен қатар Тимур Сүлейменов ипотека рәсімдеуді жоспарлап отырған қазақстандықтарға кеңес берді:

"Жалпы, менің кеңесім мынадай: егер сіз олардың шарттарына сай келсеңіз, мемлекеттік бағдарламаларды пайдаланған дұрыс. Немесе базалық мөлшерлеме және соған сәйкес ипотека бойынша нарықтық мөлшерлемелер төмендегенін күтуді ұсынамын", – деді ол. 

Еске салсақ, бұған дейін бұған дейін Қазақстанда ипотекалық тұрғын үй несиелері бойынша жылдық тиімді сыйақы мөлшерлемесінің шекті мөлшері 20%-ға дейін төмендетілгені туралы жазған едік. Алайда кейінірек жаңа норма енгізілмей жатып, қаржы нарығын реттеу және дамыту агенттігі мен Ұлттық банк ипотека бойынша шекті мөлшерлемені төмендету туралы шешімнің күшін жойды.