Қазақстанда 51 жылдық рекорд жаңарып, артынша –40 градус аяз соқты

Фото: pexels.com

2026 жылдың қаңтар айында Қазақстанда ауа райы күрт құбылды. Ай басында бірнеше қалада 50 жылдан бері сақталған температуралық рекордтар жаңарса, артынша қатты аяз орнап, кей өңірлерде ауа температурасы –40 градусқа дейін төмендеді. Бұл туралы Stan.kz ақпарат агенттігі хабарлайды.

2026 жылдың қаңтар айында Қазақстанда ауа райы ерекше құбылды. Айдың басында күн қатты жылынып, кейбір қалаларда 50 жылдан астам уақыт сақталған температура рекордтары жаңарды.

Мысалы, 11 қаңтарда Қарағандыда ауа температурасы +5,5 градус болды. Бұл бұрынғы көрсеткіштен жоғары. Шымкентте +17,4 градус, Таразда +19,3 градусқа дейін жетті. Бұл да сол қалалардағы бұрынғы рекордтардан асып түсті. 12 қаңтарда Ақтауда +13,4 градус тіркелді. Қарағандыда сол күні +1,2 градус болып, 1975 жылғы рекорд жаңарды. Яғни 51 жыл бұрынғы ең жоғары көрсеткіш бұзылды. Семей мен

Өскеменде де бұрын-соңды болмаған жылы ауа райы байқалды. 13 қаңтарда Түркістанда +16,8 градус болды. Алайда айдың ортасына қарай жағдай күрт өзгерді. Солтүстік өңірлерге суық ауа келіп, түнде температура –30…–38 градусқа дейін төмендеді. Шығыс Қазақстан мен Абай облыстарында –40 градусқа дейін аяз болды. Марқакөл метеостанциясында –42,6 градус тіркелді.

Астанада қаңтардың орташа температурасы -14,3 градус болды. Бұл қалыпты көрсеткішке жақын. Ең жылы күн 11 қаңтар (+1,6), ең суық күн 17 қаңтарда (–28,3 градус) тіркелген. Жауын-шашын да қалыпты мөлшерден 23 мм-ге көп түскен. 

• +23°: Алматыда бұрын-соңды қыста болмаған ауа температурасы тіркелді

• "−35°C-қа дейінгі аяз": Қазақстанда ақпан айында ауа райы қандай болады

Еске салайық, бұған дейін кейінгі күндері еліміздің солтүстік және шығыс өңірлерінде ауа температурасы күрт төмендегенін жазған едік. Кей аймақтарда аяз –30 градустан асып, қолайсыз метеожағдай қалыптасты. Осыған байланысты оқушылардың қауіпсіздігін қамтамасыз ету мақсатында білім беру ұйымдары уақытша қашықтан оқыту форматына көшіріліп отыр.