Қарағандыда ірі қылмыстық топ анықталды: Оның ішінде ХҚКО қызметкерлері, дәрігерлер және олардың "көмекшілері" бар
Қарағанды облысының прокуратурасы Ұлттық қауіпсіздік комитетінің Қарағанды облысы бойынша департаментімен бірлесе отырып, қылмыстық топ әрекетінің жолын кесті. Бұл туралы Stan.kz ақпарат агенттігі хабарлайды.
Қылмыстық схемаға халыққа қызмет көрсету орталықтарының, медициналық мекемелердің қызметкерлері және "көмекшілері" кірген. Олар ақшалай сыйақы үшін шетелдіктерге 700-ден астам уақытша тұруға заңсыз рұқсат берген.
Заңда уақытша тұруға ықтиярхат алуға өтініш берген кезде тұрғын үй иесінің жеке қатысуы мен келісімі қажет екені, бірақ шетелдіктерді іс жүзінде тіркеу барлық заң талабын айналып өту арқылы жүргізілгені көрсетілген.
2 электрондық-цифрлық қолтаңба заңсыз шығарылып, "eQonaq" ақпараттық жүйесінде шетел азаматтарының келуін тіркеу туралы 30-дан астам хабарлама беру үшін пайдаланылған.
Осының барлығы электронды цифрлық қолтаңба иелерінің хабарынсыз жасалған.
Айта кетері, шетелдіктерді тіркеудің заңсыз схемалары деструктивті тұлғалардың елге кіруіне қауіптер мен алғышарттар жасайды. Аталған факті бойынша сотқа дейінгі тергеу басталды.
Айта кетейік, бұған дейін Алматыдағы тұрғын үй кешенінің бірінде қару-жарақты заңсыз сақтаған 11 адамнан тұратын топ құрықталғаны туралы хабарлаған едік.