Кабинеттегі жасырын камера: Ақтөбе облысында ауданының әкіміне пара алады деген айып тағылды
Ақтөбе облысы Шалқар аудандық сотында сыбайлас жемқорлыққа қатысты іс қаралып жатыр. Айыпталушылар қатарында аудандық сәулет, қала құрылысы және құрылыс бөлімінің басшысы Шұға Сәдуақасова бар. Оған мердігерлерден пара талап етті және алды деген айып тағылды. Бұл туралы Stan.kz ақпарат агенттігі Orda.kz порталына сілтеме жасап хабарлайды.
Тергеу деректеріне сәйкес, екі эпизод бар. Бірінде шенеунік "Дәнекер" ЖШС директорынан орындалған жұмыстар актісіне қол қою үшін 5 миллион теңге талап еткен, екіншісінде "Азия строй проект 777" ЖШС-нен 8 миллион теңге алған. Ақша бөліп-бөліп Kaspi арқылы жеке тұлғалардың есепшоттарына аударылып отырған.
Сотта Шұға Сәдуақасова бұл әрекетті аудан әкімі Жанболат Жидеханның тапсырмасымен жасағанын айтты. Оның сөзінше, мердігерлерден ақша талап еткен – әкімнің өзі, тіпті кейбір соманы қолма-қол алған.
"Ол маған “Қорықпа, ештеңе айтпа, бәрін өзім шешіп аламын” дейтін. 2024 жылдың қазан айында шақырып алып, дереу ақша әкелуімді сұрады. Қаржы жоқ екенін айтқанда, өзімнің 700 мың теңгемді бердім. Кейін Актөбедегі құрбым арқылы аударымдар түсе бастады, жалпы көлемі шамамен 12,5 миллион теңге. Сол ақшаның бір бөлігін Жидехан өз қолымен алып кетті", – деді айыпталушы.
Сотта оның әкіммен әңгімесінің аудиожазбасы стенограмма түрінде жарияланды. Сарапшылар жазбаның түпнұсқалығын растады. Белгілі болғандай, әкімдік кабинеттерінде жасырын бейнебақылау жүргізілген.
Шенеуніктің қорғаушылары Жанболат Жидеханұлын сотқа шақыруды талап етіп жатыр.
Ақтөбелік депутаттың туыстарына тендер алуға көмектесетінін ашық мойындаған видеосы тарады
Еске салайық, бұған дейін Ақмола облысында пара алды деген күдікпен кіріс департаментінің басшысы ұсталғанын жазған едік. Шендінің ұсталғанын Ұлттық қауіпсіздік комитетінің Сыбайлас жемқорлыққа қарсы іс-қимыл қызметі мәлімдеді.
"Декретке миллионмен" дауы: Курстың негізін қалаған депутат Дәулет Мұқаевқа тексеріс жүргізіле ме?
