"Жылдамдығы сағатына 50 шақырымнан аспауы керек": Ішкі істер министрлігі қоғамдық көліктерге арналған жаңа жол ережесін түсіндірді
Елді мекендердегі автобустардың жылдамдығына қатысты талаптар өзгерді. Бұл туралы Stan.kz ақпарат агенттігі хабарлайды.
Фото: t.me/kolikpress
Жол жүру қауіпсіздігін арттырып, елдегі жол жағдайын жақсарту мақсатында елді мекендердегі автобустардың жылдамдығын төмендетуге қатысты түзетулер енгізілді. Бұл түзетулер 2024 жылдың 6 мамырынан бастап күшіне енді.
“Автобустар көлемінің үлкендігі мен жолаушылардың көп шоғырлануына байланысты басқа көліктермен салыстырғанда айтарлықтай қауіпті. Олардың жоғары жылдамдықпен жүруі зардабы ауыр жол апатына әкеп соғады. Сондықтан елді мекендерде олар сағатына 50 шақырым жылдамдықпен жүруі керек деген шектеу шаралары қабылданды. Аталған өзгерістер қоғамдық талқылаудан өтті. Бұл бұйрық 2023 жылғы 30 қараша мен 14 желтоқсан аралығында “Ашық НҚА” порталында жарияланды”, – делінген хабарламада.
Ішкі істер министрлігінің мәліметінше, республика бойынша автобустардың қатысуымен болған жол-көлік оқиғаларының саны 56 пайызға өскен. Биылдың өзінде автобустардың қатысуымен болған жол апаттарында 25 адам қаза тауып, 445 адам түрлі жарақат алды.
Бұған дейін Тоқаев Қазақстанда автобус жүргізушілеріне талаптарды жеңілдететін заңға қол қойған еді.