Шығын көлемі де аз емес, шамамен 100 млн теңге. Бар жиған-тергенін айлакердің есеп-шотына аударғандар бір жылдан бері әділдік іздеп келеді. Ал, жалған кәсіпкер интернеттегі жарнамасы арқылы жаңа жемтігін іздеп жатыр екен. Бұл туралы Stan.kz ақпарат агенттігі Евразия арнасына сілтеме жасап хабарлайды.

Видео Біріккен Араб Әмірліктерінің Дубай қаласында түсірілген. Сол жақтағы компаниялардың бірінде жұмыс істейтін отандасымыз еліміздің бір топ кәсіпкерлеріне, нарықтағы бағадан бірнеше есе төмен құрылысқа қажетті техникаларды жеткізіп беруге уәде еткен. Арзан бағаға қызыққан азаматтар қолындағы бар жиған-терген қаржысын алаяққа санап беріпті. Арада бір жылға жуық уақыт өтсе де, уәде етілген техника да, қаржы да жоқ.

"Договор жасайды, барлығы біздің қолымызда бар, сол арқылы біз 9 млн ақшамызды ол баланың өзінің есепшотына емес, анасына аудардық. Ол бізге түсіндіргенде айтты: "сіздерде шекарадан өткізген кезде проблема болады сол себепті сіздер менің анамның шотына аударысыздар деді. Біз оған көніп, келістік. Анасы елордада тұрады. Сол кісінің шотына жеке өз басым, жолдасым 9 млн ақшаны аударып жібердік", - деді зардап шегуші Дүйсехан Сермекбаев.

Шетелде тұратын азамат еліміздегі танымал көлік саудалайтын интернет сайттарының бірінде өзінің хабарландыруын іліп қойған. Дәл осы тектес экскаватор, трактор сынды техникаларды төмен бағада сатылатынын, көлік саны шектеулі екенін жазыпты. Қармаққа түскен клиенттерін алаяқ қаржыны елордада тұратын анасының есеп-шотына аударуын өтінген. Ал, қажетті соманы алған соң әккі айлакер кәсіпкерлерді "ертеңмен" тойдырып келген көрінеді.

"Ол айтқан 13 қаңтарға дейін тезірек келіп алсаңыздар арзандау болады, ал кейін қымбаттайды деп. Содан кейін менің жолдасым билет алып 4 адам ұшып кетіп, алып барған 18 мың 500 долларды сонда берген. Ал, қалған ақшаны мен салып жібердім. Шешесінің карточкасы Алла Владимировна Гришинаның счетына қалған ақшаны салып жібердім. Сонда общий мен 50 мың доллар салып тұрмын", - деді тұрғын Күлзилә Күшбаева.

Тіпті, Дубайда кәсібін дөңгелетіп отырған айлакердің бұрын да істі болғаны анықталыпты. Бұған дейін жеңіл көлік тасымалдаумен айналысқан "жалған кәсіпкер" 56 адамды тақырға отырғызып, 6 жылға темір торға қамалған көрінеді. Оны зардап шеккендердің өздері айтып отыр.

"Бір ай тостық. Бір ай келмегеннен кейін, интернеттен ашып қарасақ, Гришин Денис 2010 жылы 6 жылға сотталған екен. Бұрынғы ісін қарасақ, 56 адамды алдап кеткен. Біреуден 2 млн, біреуден 3 млн алған", - деді Күлзилә Күшбаева.

Дәл осы сәтте зардап шеккен азаматтың бірі көшеде кетіп бара жатқан алаяқтың анасын көріп қалып, әңгімеге тартқанда қорыққан келіншек алды-артына қарамай қашып кетті. Ал, ашынған кәсіпкерлер "өз қаржысын" қайтару мақсатында әйелді қуа жөнелді. Абыр-сабырда бір келіншекті көлік қағып, Алматыдан келген әйел жарақат алды.

Бір жылдан бері өз қаржысын қайтара алмай жүрген кәсіпкерлер "алаяқтың" анасын ұстап алып, жақын маңдағы полиция учаскесіне алып келді. Ол жерден арнайы патруль көлігі қос тарапты Есіл ауданының полиция басқармасына жеткізді. Ал, тұрғындардың 100 млн-ға жуық теңгесіне техника алып берем деп ізім ғайым жоқ болған кәсіпкер мәселе 2-3 айда шешіледі деп отыр.

"Құрметті сатып алушылар! Біздің компания сіздер тапсырыс берген техниканы орын алған қиындықтарға байланысты жеткізіп бере алмайды. Олқылықтар үшін кешірім өтінеміз!. Аударылған қаржы келісім-шарт негізінде бөлік-бөлікпен 3 ай мерзімде толық қайтарылады", - деді Денс Гришиннің өзі.

"Ұлымның кінәлі екенін білемін. Оны жасырмаймын. Оған қанша айттым адамдардың ақшасын қайтар деп. Енді, мен не істей аламын? Ол шетелге жұмыс істеуге кеткен. Сол себепті, ұлыммен араласпай да қойдым. Мен тыныш өмір сүруді қалаймын. Адамдар ақшаларын қайтаруын талап етіп, үйімнің алдында аңдуды шығарды. Қауіпсіздігіме алаңдаймын", - деді кәсіпкердің анасы Алла.

Зардап шеккен азаматтардың саны қазір 15 адамға жеткен. Шығын көлемі шамамен 100 млн теңге. Бұл бүгінгі есеп бойынша. Шетелдегі кәсіпкердің арбауына түскендердің қарасы көп болуы мүмкін. Себебі, еліміздің түкпір-түкпірінен дәл осы тектес шағыммен, алданғандарға хабарласып жатқандардың қарасы қалың екен.

Талқылау