Депутат балаларды зиянды тамақ жарнамасынан қорғауды ұсынды
Сенат депутаты Ақмарал Әлназарова Қазақстандағы балалар арасында семіздік мәселесін өршіп келе жатқанын айтып, премьер-министр Асқар Маминге сауал жолдады, деп хабарлайды Stan.kz ақпарат агенттігі.
Сенатор атап өткендей, Қазақстанда балалардың шамамен 20 пайызы семіздікке шалдыққан.
"Семіздіктің негізгі себебі - энергетикалық баланстың бұзылуы, оның ішінде калория, май, тұз және қант мөлшері жоғары тағамдарды тұтынумен байланысты. Зиянды тамақтарға әуестік әсер ететін негізгі факторлардың бірі - агрессивті маркетинг. Бұл ретте балалар тамақ өнеркәсібінің маркетингтік стратегиясының мақсаты болып табылады", - деді Ақмарал Әлназарова.
Оның айтуынша, қазақстандық ұлттық қоғамдық денсаулық сақтау орталығының зерттеушілері алты ұлттық телеарнада, соның ішінде балалар арнасында барлық жарнамалық өнімдердің 32,8 пайызын азық-түлік жарнамасы құрады деген қорытындыға келді. Ең жиі жарнамаланатын категория құрамында қант бар сусындар болды, олардың 22 пайызы, 17 пайызы шоколад пен энергетикалық барлар болды.
"Жалпы Қазақстан бойынша жарнамаланатын тамақ өнімдері мен сусындардың 72,3 пайызы ДДҰ ұсынымдары бойынша тыйым салынғандарға жатқызылды. Өкінішке орай, зерттеуге кабельдік және спутниктік теледидар, сондай-ақ 256-дан астам шетелдік теле және радиоарналар, сондай-ақ сандық маркетинг: интернет, әлеуметтік желілер, компьютерлік ойындар және т.б. кірмеді. Қазақстанда балалардың құрамында қаныққан май, бос қант пен тұз мөлшері жоғары өнімдер маркетингінің үлкен көлемінің ықпалына ұшырағанын мойындау қажет", - деп толықтырды депутат.
- Мамандар: 6 айдан асқан сәбилер жұмыртқа, ет өнімдерімен қоса дәуірмендері бар көкөністер жеу керек
- Зиянды тағамды пайдалы етудің әдісі табылды
- Бір аптада артық салмақ жоғалтудың 17 әдісі
Ақмарал Әлназарова Қазақстанда балаларды денсаулығы мен дамуына зардабын тигізетін ақпараттан қорғау мәселелері "телерадио хабарларын тарату туралы", "Жарнама туралы" және "Балаларды денсаулығы мен дамуына зардабын тигізетін ақпараттан қорғау туралы" заңдармен реттелетінін атап өтті.
"Өкінішке орай, жоғарыда аталған заңдарда жас ұрпақтың денсаулығына зиянды әсер ететін өнімдер мен сусындар туралы ақпараттың таралуын шектейтін жеткілікті нормалар жоқ. Жоғарыда айтылғандарға байланысты, құрметті Асқар Ұзақбайұлы, сізден Қазақстан Республикасының заңнамалық актілеріне балаларға дұрыс тамақтану туралы ақпаратты толық көлемде алуға құқық беретін, жоғарыда аталған тамақ өнімдерінің маркетингін барлық бұқаралық ақпарат құралдарында, соның ішінде интернетте шектейтін және реттейтін тиісті өзгерістер мен толықтырулар енгізу мүмкіндігін қарастыруыңызды сұраймыз", - деп түйіндеді сенатор.