Бұрынғы сүйіктісіне қол көтерген актер Шәріп Серік "қара тізімге" енгізілді
Желіде актер Шәріп Серіктің бұрынғы сүйіктісіне қол көтерген видеосы тарағаннан кейін, Salem Entertainment компаниясы актермен барлық байланыстарын үзіп, әріптестікті тоқтататынын мәлімдеді. Бұл туралы Stan.kz ақпарат агенттігі хабарлайды.
Фото: instagram.com
Компанияның мәлімдемесінде актердің “қара тізімге” енгізілгені айтылған.
"Соңғы оқиғаларға байланысты Salem Entertainment ұжымы актер Шәріп Серікті “қара тізімге” енгізіп, онымен кез келген ынтымақтастықты толығымен тоқтатты.
Қазіргі уақытта бұған дейін жарияланған "Шакал" сериалы мен “Qarga” сериалының үшінші маусымы ресми түрде жабылды. Сонымен қатар, актер “Meow” сериалының екінші маусымында басты рөлдердің бірін сомдауы тиіс болған, алайда ол жобадан толықтай алынып тасталды", – делінген компанияның ресми мәлімдемесінде.
Сонымен қатар "Патруль: Соңғы бұйрық" фильмінің командасы да прокатқа шығуға дайындалып жатқан туындыдан Шәріп Серік қатысқан көріністерді алып тастамақ.
Salem Entertainment компаниясы актермен жасалған барлық келісімшарттар бұзылғанын атап өтті.
Еске салсақ, бұған дейін танымал актер Шәріп Серіктің бұрынғы сүйіктісі актердан зорлық-зомбылық көргенін мәлімдеген еді. Артынша актердің өзі бұрынғы сүйіктісіне қол көтергенін мойындап, кешірім сұрады. Ал сот актерді кінәлі деп тауып, 5 тәулікке қамауға алу туралы шешім шығарды.