"Басқа қаладан пәтер, қонақ үй брондауда сақ болыңыз": ІІМ қазақстандықтарға алаяқтықтың жаңа түріне байланысты ескерту жасады

Фото: freepik.com

Құқық қорғаушылар қазақстандықтарға алаяқтықтың жаңа түрі туралы ескерту жасады. Алаяқтар бұл жолы интернет-ресурстарда пәтер немесе қонақүй нөмірін брондаған кезде, пайдаланушыларға банк картасының деректерін жіберуді сұрайды. Бұл туралы Stan.kz ақпарат агенттігі Polisia.kz порталына сілтеме жасап хабарлайды. 

ІІМ мәліметінше, танымал интернет-ресурстарда пәтер немесе қонақүй нөмірін брондаған кезде, пайдаланушыларға банк картасының деректерін жіберуді сұрайтын хабарламалар келеді. Бұл – карта мәліметтері жеке кабинетте тіркелгеніне және қосымша растауды қажет етпейтініне қарамастан орын алуда.

“Осыған байланысты Ішкі істер министрлігі азаматтарды басқа қалаға немесе мемлекетке демалысқа не іссапарға жоспар құру кезінде барынша сақ болуға шақырады. Алаяқтардың құрбаны болмау үшін сайттың мекенжайын тексеріңіз”, – делінген хабарламада. 

• Пәтерді алдап сатқызып, баспанасынан айырады: Алаяқтардың жаңа схемасынан қалай қорғана аласыз

• Көбіне жастар мен зейнеткерлерді тартады: Қазақстанда төлем карталары арқылы жасалатын алаяқтық схемалары көбейіп барады

Одан бөлек, ведомсвто мына шараларды ұмытпауға шақырды: 

1. Банк картаңыздың деректерін тікелей чатта жібермеңіз.
2. Күмәнді ұсыныстардан сақ болыңыз – тым арзан бағалар көбінесе алаяқтықтың белгісі.
3. Пәтер немесе қонақүйді жалға алмас бұрын пікірлермен танысыңыз, жарияланған уақыты мен жарнаманың қанша уақыттан бері сайтта тұрғанын қарап шығыңыз – бірнеше жылдан бері жарнамаланған нысан сенімдірек болады.
4. Толық алдын ала төлем талап етілетін жағдайлардан аулақ болуға тырысыңыз, төлемді тек нысанды өз көзіңізбен көріп, болғаннан кейін жасаған жөн;
5. Күдікті хабарламалардан сақ болыңыз: мессенджерлерде, электрондық поштада немесе әлеуметтік желілерде келген сілтемелер жалған сайттарға апаруы мүмкін;
6. Пәтерді немесе қонақүй нөмірін тек танымал, сенімді платформалар арқылы брондаңыз: сайт күмән тудырса, тексеріп алыңыз және тәуекел етпеңіз.