AAPL
172.1 $
2.14 %
TSLA
900.09 $
4.68 %
NDAQ
190.42 $
2.06 %
GOOGL
121.68 $
2.39 %
FRHC
57.85 $
0.75 %
AAPL
172.1 $
2.14 %
TSLA
900.09 $
4.68 %
NDAQ
190.42 $
2.06 %
GOOGL
121.68 $
2.39 %
FRHC
57.85 $
0.75 %
Соңғы жаңалықтар
Соңғы жаңалықтар

"Кіруге және тұраққа төлеген": Қапшағайда суға батып кеткендердің туыстары қайғылы оқиғаға кінәлілерді табуды талап етуде

Бір әулеттің төрт бірдей адамы суға кеткен Қапшағайдағы демалыс орны заңсыз жұмыс істеген. Заңсыз жағалау орналасқан жер екі жыл бұрын ауылшаруашылық мақсатында пайдалануға берілген екен. Демалыс аймағында ешқандай қауіпсіздік талабы сақталмағанын айтқан марқұмдардың туыстары әділдік іздейді, деп хабарлайды Stan.kz ақпарат агенттігі “КТК” арнасына сілтеме жасап.

Қара жамылған отбасы суға түспеңдер деген ескертуді ешкім айтпады деп отыр.

Кәмелет жасына толмаған екі бірдей баласынан айырылып, Жәмила қайғыдан бас көтере алмай жүр. Қапшағай су қоймасындағы қайғылы жайт жалғызбасты ананың еміс-еміс есінде. Себебі 12 мен 15 жастағы екі ұлын құтқарамын деп жанталасқан келіншектің өзі де суға батып кете жаздаған. 

“Мен інім Арманның көмек сұрап айғайлағанын естідім. Оның жанында екі ұлым болды. Олардың суға батып бара жатқанын көріп қалай жүгіргенімді байқамадым. Бір уақытта өзім де суға кіріп, шыға алмай жаттым. Есімді жисам, жағалауда отыр екенмін. Бірден балаларымды іздедім. Бірақ барлығы тым кеш еді. Ол жер таяз болатын. Алайда екі-үш қадамнан кейін шұңқыр бар. Соның кесірінен баттық”, – дейді Жәмила Сабыржанова.



Жеткіншектерді судан алып шығуға ұмтылған Жәмиләнің 30 жастағы туған інісі мен 32 жастағы сіңілісі де ажал құшты. Олардың денесін толқын жағаға бір-ақ шығарған. Ал мектеп оқушыларын сүңгуірлер су астынан үш сағатта әрең тауыпты. Немерелері мен балаларының жанұшыра шыққан даусын естіп, суға секіріп кеткен Сәлия әжей сол күнді қорқынышты түстей есіне алды.

“Қапшағайға біз екі көлікпен бардық. Балаларды қосқанда 13 адамбыз. Бізге толқын мен үлкен шұңқыр бар екенін ескерткен тірі жан болмады. Адамдар емін-еркін суға түсіп жүрді. Мен де бір ажалдан аман қалдым. Айналдырған 15 минуттың ішінде абыр-сабыр болып кетті. Мені қайта бір жігіт құтқарып шықты. Жағажайға кіру үшін бізден ақша алды ма, барлығы қауіпсіздік талаптарына сай болсын. Кәсіпкердің қатаң жазаға тартылғанын сұраймын”, – дейді Сәлия Смағұлова.

Күні кеше ғана жақындарын жер қойнына тапсырған әулет қазаға қалтасының қамын ғана күйттейтін демалыс аймағының қожайыны кінәлі деп отыр. Сәлия Смағұлова демалушылардан ақшаны алуды білетін кәсіпкер толқындар көтерілгенде "суға түспеңдер" деп бір ауыз ескертуге жарамады деп ашулы.  

“Салғырттық қой. Толқындар тербеліп жатыр. Шұңқыр кез келген адамды ағызып жібереді. Егер адам шомыла алмаса, осы шырмауықтан шығуы екіталай. Бізге айтса, түсінетін едік. Дегенмен тірі жан келмеді. Бұл жер қауіпті деп айтпады. Екі баламды жоғалтып алдым. Екі немерем де өмірде жоқ. Әрі қарай қалай өмір сүреміз? Өз ісіне немқұрайлы қарайтын адамдарды жазаға тарту керек. Біз соңына дейін барамыз”, – дейді Сәлия Смағұлова.

Бір апта бұрын қайғылы оқиға болған демалыс орны жабық тұр. Осы демалыс аймағына кіру үшін әр көлік үш мың теңгеден төлеуі тиіс. Алайда ақылы жағалауда шомылуға ешқандай жағдай жасалмаған. Мұнда құтқарушылар да, тыйым салу белгілері де мүлдем жоқ.

Қонаев қаласы жер қатынастар бөлімінің мамандары "Голубой залив" атты жағалау заңсыз жұмыс істеп жатқанын айтты. Өйткені кәсіпкерге судың жанындағы жер екі жыл бұрын ауылшаруашылық мақсатында пайдалануға берілген екен. Ал қожайыны болса ат шаптырым аумақты қоршап алып, суға шомылатын демалыс базасын ашқан. Кәсіпкердің әрекетін енді облыстан арнайы құрылған комиссия тексермек.

“Қапшағай су қоймасында оқыс оқиға орын алған жер учаскесі "Индекси" ЖШСне тиесілі. Жер уческесінің пайдалану мақсатындағы санатындағы жерлер болып есептеледі. Көлемі 24 гектар. Аталған жерге демалыс базасын ұйымдастырып, демалушыларға ақылы түрде қызмет көрсетуге тыйым салынады. Қазір енді Алматы облыстық жер ресурстарын басқару департаментімен бірігіп комиссия құрылып, осы участік жөнінде тексеру жұмыстары ұйымдастырылатын болады”, – дейді Қонаев қаласы Ауыл шаруашылық және жер қатынастар бөлімінің басшысы Рауан Жамағатов.

Ағайындылар ағып кеткен демалыс аймағының қожайыны бүгін өз орнында жоқ. Ол оқыс оқиға болған күні де сұхбат беруден бас тартқан болатын. Ал ауыр қазадан әлі күнге дейін есеңгіреген күйі отырған тұтас бір әулеттің мүшелері полиция мен прокуратураға арыз жазбақшы. Айта кетейік, Қапшағай су қоймасында шомылуға ресми рұқсат етілген жеті жағалау бар. Бірақ адамдар көбіне жабайы жағалауларда суға батып кетіп жатыр. Төтенше жағдай департаментінің мәліметінше, жаз басталғалы Жетісу мен Алматы облыстарында жеті адам суға кеткен, оның екеуі – бала.

Талқылау
Пікір
Қазір оқып жатыр
Қазір оқып жатыр