Астанада такси жүргізушісі жолаушыларға қызының туғаны туралы өтірік айтып, көрімдік сұрап келген
Фото: tass.ru
Астанада жолаушыларға қызының туғаны туралы өтірік айтып, көрімдік сұрап келген такси жүргізушісі ұсталды. Бұл туралы Stan.kz ақпарат агенттігі хабарлайды.
Бұл туралы журналист Әділ Балтабаев Threads желісіндегі парақшасында мәлімдеді.
"Құрбыммен таксиде келе жатырмыз. Такси жүргізушісіне біреу қоңырау шалды. Ол айғайлап: "Шынымен, босанды ма? Құдайға шүкір" деді. Құрбым оны құттықтап, жақсы тілектерін айтып жатты, ал менің есіме бір ай бұрынғы оқиға түсті. Бір ай бұрын дәл осы такси жүргізушісі мені әуежайға апарған кезде де қызының туғанына қуанып еді", – деп жазды журналист.
"Қуанышты қоңыраудан" кейін такси жүргізушісі жолаушыларға досына ақша қарыз бергенін айтып, пәтерінің ипотекасын төлеуге шамамен 20 мың теңгесі жетпей тұрғанын айтқан.
"Мен жүргізушінің айтқалы жатқандарын алдын ала құрбыма жеке хабарламада жазып жатырмын, ал такси жүргізушісі сөзбе-сөз дәл солай қайталайды. "Сүйінші бермейсіздер ме?" дейді. Біз бұл туралы қолдау қызметіне жаздық. Елестетіңізші, ол қанша адамды осылай алдаған", – дейді Әділ Балтабаев.
Оның айтуынша, алғаш рет ол жүргізушіге сеніп, оған 20 мың теңге аударған көрінеді.
"Мені алдау қиын, бірақ ол өте сенімді болды. Тіпті осы жолы құрбым да "ол қызының туғанын естігенде көзінен жас шықты" дейді. Мүмкін, ол осы әңгімені қайталап айта беріп, өзі де оған сеніп қалған. Абай болыңыздар", – деп жазды журналист.
Астана полициясы жазбаға дереу әрекет етіп, жүргізушіні ұстаған.
"Такси жүргізушісі полиция бөлімшесіне жеткізіліп, оған түсіндіру жұмыстары жүргізілді. Ол барлығын мойындаған", – делінген жазбада.
Еске салсақ, бұған дейін Астанада көлікте өзін-өзі қанағаттандырған такси жүргізушісі 15 тәулікке қамалғаны туралы жазған едік.
"Желке сүйегін алып тастады": Астанада тұрғын үй кешенінің ауласында кішкентай қыздың үстіне футбол қақпасы құлаған
