Осы бір қазыға ұқсас, ерекше тағамның тіл үйіретін дәмінің сырымен оңтүстік келіндерінің бірі Гүлнұр ханым бөлісті. Бүгінде кей асханаларда “үй шұжығы” деп сатылып жүрген тағамды, бұрындары әр қазақ отбасы қой сойылған күні әзірлейтін болған. Stan.kz сайтының тілшісі назарларыңызға әсіп жасаудың көне әдісін ұсынады.

ас7

Гүлнұр ханым кешкі асқа әсіп дайындағалы жатыр екен. Құрамы: қой еті, бауыры мен өкпесі, күріш, қойдың бүйені, бір сәбіз, бір қызылша, екі жуа, екі сарымсақ, тұз, қара бұрыш, аскөк және «Зира» аталатын дәмдеуіш. Гүлнұр етті базардан бірден тартқызып алатын көрінеді. Сондықтан қара бауыр мен өкпе бірге, ал ет өз алдына алдын ала тартылған.

ас5

Барлық затты бірдей барынша майдалап турап алу керек.

ас4

Бүйенді, кем дегенде, жарты сағатқа тұзды молынан салып, суға малып қойып, соңынан сол сумен жақсылап жуу керек. Күрішті де алдын ала суға салып қойған жөн. Бүйеннің орнына ішек қолдануға болады. Алайда, Гүлнұр ханым әрдайым бүйен қолданады екен. Ал ішектің бір жағын тігіп алу керек. Қосылатын көкністерді майдалап турап не ет тартқыштан өткізсеңіз де болады.

ас6

Соңынан бәрін араластырып алып, бір кесе су қосамыз. Гүлнұр ханымның айтуынша, қызылшаны қосу міндетті емес. Және керісінше, қалауыңызға қарай, тағы көкөністер мен дәмдеуіштер қосуға болады.

ас3

«Қоспаны даярлауда, күріштің шамадан асып кетпеуін қадағалау керек. Себебі ол ісінгенде, бүйен жарылып кетуі мүмкін», – дейді Гүлнұр.

ас1

Дайын болған қоспаны бүйенге саламыз. Аузын жіппен байлап, суға саламыз. Бір қайнап шыққан соң, көбіктен тазартып, инемен тесіп шығамыз. Әсіп 45 минутта дайын болып қалады.

ас2