Алматыда алаяқтар өздерін Әділет департаментінің қызметкерлеріміз деп таныстырып, адамдардан ақша талап еткен

Алматыда өздерін Әділет департаментінің қызметкерлеріміз деп таныстырған алаяқтар пайда болды, деп хабарлайды Stan.kz ақпарат агенттігі.

"Схема бойынша шабуылдаушылар интернет пен әлеуметтік желілер арқылы жалған тауарларды жоғары бағамен сатады. Мәміле жасалғаннан кейін телефондар өшіріледі. Одан әрі алаяқтар жәбірленушілерге телефон соғып, өздерін әділет департаментінің қызметкерлеріміз деп таныстырып, алаяқтардың ұсталғаны туралы хабарлап, жалған куәлік беріп, өтемақы төлеуге уәде береді. Бірақ олар алдын ала комиссия түріндегі аванстық төлем талап етіп, осылайша алаяқтық жолмен ақша алады”, – деді Әділет департаментінің атқарушылық іс жүргізу басқармасының басшысы Әнуар Жексеков.

Ол Әділет департаментінің материалдық және қаржылық өтемақы қарастырмайтынын атап өтті.

"Мұндай фактілер 2022 жылдың желтоқсан айының басынан бері тіркелді. Барлық дәлелдейтін материалдармен бірге Алматы полиция департаментіне арыз жолданды, арыз бойынша тергеу жүріп жатыр. Ал, алаяқтар халықты алдауды жалғастыруда. Күн сайын Әділет департаментіне республиканың түкпір-түкпірінен қызметкерлердің аты-жөнін нақтылау үшін қоңыраулар түсіп жатыр. Небәрі екі айдың ішінде 300-ге жуық қоңырау түсті", – дейді департаменттің баспасөз хатшысы Алмас Бекботаев.

Ол еліміздің барша тұрғындарын туыстарын, достары мен таныстарын алаяқтық фактілері туралы ескертуге, алаяқтардың арандатушылықтары мен үгіттеріне берілмеуге шақырды. Осындай жағдайлар орын алған жағдайда Алматы қаласы Әділет департаментінің қазіргі қызметкерлері туралы ақпарат алу үшін +77772522323 нөміріне хабарласуға болады.

Сонымен қатар, бөлімнің ресми сайтында қызметкерлердің тізімдері жарияланған.