Instagram желіcінде лотерея ұйымдастырып, көлік ойнатқан блогер айыппұл арқалады
Алматы облысында әлеуметтік желіде заңсыз лотерея ойнатқан қолданушыға айыппұл салынды. Бұл туралы Stan.kz ақпарат агенттігі хабарлайды.
Фото: Pixabay.com
Алматы облысының Балқаш аудандық сотында Н-ға қатысты әкімшілік құқықбұзушылық туралы кодекстің 445-1-бабы “Лотереялар және лотерея қызметі туралы заңнамасын бұзу” бойынша іс қаралды.
Шілдеде Н өзінің Instagram парақшасында заңсыз лотерея ұйымдастырып, "Jetour" маркалы автокөлігін ойнатқан. Ол лотереяға қатысу үшін 1 билетті 200 теңгеге сатқан. Яғни оның жеке банктік шотына аудару қажет болған.
Н лотерея операторы болып саналмайтындықтан, лотерея ұйымдастыра алмайды. Оның кінәсі Instagram парақшасының скриншоттары және істің басқа да материалдарымен расталды.
“Сот Н-ны әкімшілік құқы бұзушылық жасағаны үшін кінәлі деп танып, оған 100 АЕК, яғни 369 200 теңге көлемінде айыппұл түрінде жаза тағайындады”, – деп мәлімдеді Алматы облыстық соттың баспасөз қызметі.