Соңғы жаңалықтар
Соңғы жаңалықтар

Ақтөбеде ерлікпен қаза тапқан инспектордың отбасына шенділер уәде еткен пәтерін бермей жүр

Ақтөбеде радикалдардың қолынан қаза тапқан полицейдің отбасы шенеуніктердің уәдесін орындата алмай жүр. Темірбек Жақсылықбаевты экстремистер 8 жыл бұрын қала сыртында атып өлтірген. Сол кезде аймақ басшынан бастап, генералдарға дейін қаралы отбасыға тәртіп сақшысының ерлігін ескеріп, "көшеге атын береміз" деп уәде берген. Көше тұрмақ, сол уақыттан бері ұядай үй де бермеген. Содырлар қолынан қаза тапқан Темірбектің жесірі мен жетім қалған ұлы содан бері қызметтік пәтерде тұрып жатыр. Бұл туралы Stan.kz ақпарат агенттігі "КТК" арнасына сілтеме жасап хабарлайды.

Темірбек Жақсылықбаевтың отбасы қазаға көндіккенімен, құр уәде мен әділетсіздік титықтатып жіберген. Тәртіп сақшысының экстремистер қолынан қаза тапқаны толық дәлелденгенімен, 8 жыл бұрынғы оқиға лаңкестік шабуыл деп танылмапты. Сол кезде түнгі кезекшілік кезінде қылмыстық топты ұстауға қала сыртына дейін қуып барған Темірбекті экстремистер атып өлтірген.

"Сол уақытта оларға тура сол бір қызметкердің қанын төгу керек болды. Бәрібір болған. Менің күйеуім бе, басқа бола ма. Полицейлерді өлтіру керек болған сол күні. Полиция күні ғой", - деді марқұмның жесірі Гүлфия Жақсылықбаева.

Қайғылы оқиғадан соң көңіл айтып келген облыс әкімінен бастап, генералдар мен депутаттар марқұмның атына көше беріп, "ерлігі елеусіз қалмайды" деп уәде беріпті. Жесірі мен жетім қалған төрт жасар ұлына үй берілетінін де айтқан. Бірақ сегіз жылдан бері көше тұрмақ, қуықтай баспана да бұйырмапты. Тек үшінші дәрежелі "Айбын" орденін табыстаған. Әлі күнге дейін марқұмның отбасы полицейлердің қызметтік пәтерінде тұрып жатыр.

"Келіп, балама үй береміз деді. Сосын Бес жылдан кейін көше береміз деді. Генералдың өзі, Амиров па, сол кісі болды, өз аузынан шықты. Немерем сол кезде төрт жарым жаста. Суретін бір жылға дейін құшақтап жылап жүрді. Енді қазір өсті. Амандық болса, он үшке толады. Әлі үйі жоқ, атағына берген көшесі де жоқ", - деді марқұмның анасы Садира Қасенова.

Ерлікпен қаза тапқан марқұмның отбасына сол кездегі әкім Архимед Мұхамбетов уәде еткен үйді облыстың ендігі басшылары бергісі жоқ. "Уәдені берген адамнан сұрау керек" дегенге саяды жауаптары.

"ҚР заңнамасына сәйкес, кезектен тыс және де отбасы жағдайы ескеріліп, кезектен тыс үй беру қарастырылмаған. Қызмет бабында атқарылған жұмыстары, барлығы кезек ретімен тұр. Бұл жерде бұл кісілерден бөлек , жағдайын, әрине, түсінеміз. Бұлармен қатар да басқа азаматтар да бар, осындай жағдайға тап болған. Барлығы кезекке тіркелген", - деді Ақтөбе облыстық энергетика және ТКШ басқармасы басшысының орынбасары Ержан Мұздыбаев.

Бұрынғы әкімдер мен полиция департаменті басшыларының берген уәдесін қазір ешкім мойнына алғысы келмейді. Ал содырлар қолынан қаза тапқан Темірбек Жақсылықбаевтың ерлігі осылай ұмытылғанына туғандары наразы. Енді тек ат арытып Ақордаға барудан басқа шара қалмады деп отыр.

Талқылау
Пікір
Қазір оқып жатыр
Çàãðóçêà...
Қазір оқып жатыр