АҚШ Венесуэла үстіндегі әуе кеңістігін жауып тастады

Фото: АР

Дональд Трамп Венесуэла әуе кеңістігін толық жабатынын мәлімдеді. Ол бұл шараны адам саудасымен, есірткі тасымалымен айналысатындарға қарсы қолданып жатқанын түсіндірді. Бұл туралы Stan.kz ақпарат агенттігі хабарлайды.

Бұл шешім аймақтағы әскери қозғалыстың артуы және Вашингтон мен Николас Мадуро үкіметі арасындағы өзара сенімсіздік аясында қабылданған.

Truth Social платформасында ол авиакомпанияларға, ұшқыштарға және "заңсыз әрекетпен айналысатындардың бәріне" Венесуэла үстіндегі әуе кеңістігі енді жабық екенін ескертті.

"Барлық авиакомпанияларға, ұшқыштарға, есірткі таратушыларға және адам саудасымен айналысатындарға Венесуэла үстіндегі және оның маңындағы әуе кеңістігі жабық", – деп жазды Трамп.

Ақ үйдің айтуынша, Каракас АҚШ-қа есірткі тасымалын белсенді түрде қолдап, ұлттық қауіпсіздікке қауіп төндіріп отыр. Бұған дейін Трамп Кариб теңізіндегі АҚШ әскери әуе күштерін күшейткен. Оны есірткіге қарсы күрес қажеттілігімен түсіндірген.
Азаматтық авиация федералдық басқармасы да бұл шешім Венесуэла маңындағы қауіпсіздік жағдайының нашарлауы және әскери белсенділіктің артуымен байланысты екенін атап өтті.

• Мыңдаған Airbus ұшақтарынан ақау анықталды: Енді кей рейстер кешігіп, кейбірі тоқтатылмақ

• АҚШ Вашингтонда Ұлттық гвардия сарбазы өлтірілген соң шетелдіктердің баспана сұрау өтінішін қарауды тоқтатты

Ал Венесуэла президенті Николас Мадуро, керісінше, Вашингтон оны биліктен құлатуға дайындалып жатыр деп санайды.

28 қарашада New York Times екі ел арасындағы өсіп келе жатқан шиеленіс фонында Трамп пен Мадуро телефон арқылы сөйлескенін хабарлады. Басылымның дерегінше, олар АҚШ-та жеке кездесу мүмкіндігін талқылаған. Әңгімеге мемлекеттік хатшы Марко Рубио да қатысқан.