Қазақстандық 9 жасар қыздың еміне ақша жинау үшін Мәскеуге велосипедпен аттанды

Фото: Анастасия Судакованың жеке архиві

34 жастағы Никита Судаков велошеруін ақсайлық 9 жасар Томирис Шайымбетоваға арнады. Балаға церебральды сал ауруы мен эпилепсия диагнозы қойылған, сондықтан отбасына жаттығу терапиясы мен дәрі-дәрмек алу қажет. Осы мәселеге назар аудару үшін Никита Мәскеуге велошеруге шықты. Бұл туралы Stan.kz ақпарат агенттігі Мой город сайтына сілтеме жасап хабарлайды. 

Никитаның әйелі Анастасия Судакова бұл күйеуінің алғашқы ұзақ сапары емес екенін айтты. Никита спортпен, соның ішінде жүгірумен айналысады, турникке тартылады. Күн сайын жаттығады, 30-60 шақырымды жүріп өтеді.

“Кейде 100-150 шақырымдай ұзақ жолдарға бірге барамыз. Бір апта қалғанда біз Орынборға барып қайттық, бір күнде 380 шақырым. Ол өзін сынап, арнайы блог жүргізіп, адамдарға Томирис туралы айту үшін Мәскеуге баруды шешті. Сапар кезінде кез келген адам оның картасына ақша аудара алады. Сапар соңында жиналған барлық қаражат қыздың отбасына беріледі”, – деді Анастасия Судакова.

Никита Томириспен бір жарым жыл бұрын қайырымдылық кешінде танысқан. Концертте екі әнді бірге орындаған. 

Никита сапарын 13 тамызда бастады. Бірінші күні нөсер жаңбырда 220 шақырымды бағындырды. Келесі күні 90 шақырым, бірақ сол кезде доңғалағы жарылып қалды. Үшінші күні ол 150 шақырымды жүріп өтті. Судаков өз блогында жолды қалай жүріп өткенін, шатырды қалай тіккенін айтады.

Фото: Анастасия Судакованың жеке архиві

20 тамызда велошабандоз Мордовияда болды. Әйелі Анастасияның айтуынша, егер бәрі ойдағыдай болса, бір-екі күннен кейін Мәскеуге жетіп, біраз демалып, кері сапарға аттанады. Жалпы, ер адам үш мың шақырымға жуық жол жүреді.

Никита өнеркәсіптік желдету саласында жұмыс істейді. Велосипед тебу оның хоббиіне биыл ғана айналды.

Ал қыздың анасы Сайханат Шайымбетова Никитамен күнде интернет арқылы сөйлесетінін айтады. Томирис қатты уайымдап, оның елге аман-есен оралуын күтіп отыр. Әйелдің айтуынша, олар қор ашпаған. Никитаға жай ғана сапарда қаржылай қолдау көрсетіліп жатыр, бірақ оған ақша қажет емес және оны емге бермекші. 

“Оның сапары туралы мүмкіндігінше көп адам білгенін қалаймын. Ақша жинағаны туралы емес, оның іс-әрекеті, жалғыз жүріп келе жатқаны, шатырда түнеп жатқаны, өйткені жол қауіпті. Никита телефон соғып, кездесуді белгілегенде Томирис қатты қуанды. Олар бір-бірін жақсы таниды. Ол шынымен де асыға күтеді”, – деді Сайханат Шайымбетова.